اسلام آباد۔ 19 جون (اے پی پی) چیئرمین قمر زمان چوہدری پارینے کہ قومی احتساب بیورو ملک آن بدعنوانی نا چٹفنگ کن پرعزم ئِ ، ملک اٹی بدعنوانی نا برخلاف نیب ”زیروٹالرنس “ نا پالیسی ئِ تینا کرینے، کرپشن و بدعنوانی نا چٹفنگ کن جامع قومی انسداد بدعنوانی حکمت عملی اس مرتب کننگانے، جتا حکومتی، غیر سرکاری ادارہ، سول سوسائٹی، میڈیا و راج انا ایلو تپہ غاتا ذریعہ کرپشن نا برخلاف بناءکروک آ مہم نا گچین زئم مون آ بننگ ئِ۔ تدوک آ دے دا آگاہی مہم نا بارواٹی معلومدار کرسا چیئرمین نیب قمر زمان چوہدری پارے کہ ” پابو کرپشن آخا“ نا نعرہ آن بناءکروک آ مہم اینخو نا سال انا وخت تینا بے کچ عروج آ رسینگانے، مہم نا رداٹ غٹ بینک آتا اے ٹی ایم مشین آتیا دا نعرہ بطور اشتہار تننگانے۔ انسداد بدعنوانی نا دے 2015 ءایوان صدر اٹی صدر ممنون حسین نا کماشی ٹی قومی سیمینار اڈ تننگا۔ اقوام متحدہ نا کمک اٹ ہم سیمینار اڈ تننگا ہرانا کماشی ئِ صدر ممنون حسین کرے ہراٹی او نیب انا دا مہم نا ستائِ کرسا اودے پورو کمکاری نا یخین دہانی کرفے۔ نیب غیر سرکاری تنظیم پلڈ اٹ نا کمک آن ہم سیمینار اس اڈ تس ۔ نیب و واپڈا تین پہ تینی اشترا ک آن واپڈا ہاﺅس لاہور اٹی سیمینار اڈ تسر ۔ نیب و ہائیر ایجوکیشن نا نیام اٹ اسہ مفاہمت نا یات داشت اسیا دستخط کننگانے ہرانا رداٹ جامعہ غاتا طالب علم آتے ٹی آگاہی مہم چلیفنگک و دارداٹ کڑدسازی سوسائٹی تے اڈتننگک۔ پاکستان کرکٹ بورڈ انا کمک آن 2015ءنا ورلڈ کپ اکن رادہ مننگ آن مست کرکٹ ٹیم ہم او مہم اٹی بشخ ہلک۔ نیب و پاکستان ہاکی ٹیم اواری اٹ ہم دا مہم ئِ مون آ دریر۔ اوکان بیدس ایس این جی پی ایل ۔ آئیسکو، گیپکو ، فیسکو، و الیکٹرک تون اواری اٹ کرپشن، بدعنوانی نا برخلاف نعرہ ئِ بلز آ پرنٹ کننگ انگ ئِ۔ پاکستان پوسٹ نا کمکاری آن انسداد بدعنوانی نا جہانی دے انا وخت آ خصوصی ٹکٹ جاری کننگا۔ نیب و پی ٹی اے نا کمکاری آن پی آئی اے، وزارت قومی جان جوڑی ، موٹروے پولیس، پاکستان فلم سسز بورڈ و اسلام آباد ٹریفک پولیس تون اواری اٹ آگاہی مہم چلیفنگ انگ ئِ۔ اوپارے کہ سی ڈی اے و موٹروے پولیس ئِ صلاح تننگاکہ او بل بورڈز آ دا کلہو ئِ آویزاں و موٹروے آ سفر کروک آتسکان نیب انا دا کلہو ئِ رسیفے۔ اسلام آباد اٹی سیل و سواتی بنجاءدامن کوہ، شکر پڑیاں ، ایئر پورٹ و زیروپوائنٹ اٹی ہندن ئُ بل بورڈ نصب کننگے۔ غٹ پولیس اسٹیشن آتیا نیب انا نعرہ ئِ آویزاں کننگ، غٹ حکومتی ٹینڈر آ کرپشن آخا نا کلہو آتے چھاپ کننگا۔ چیئرمین نیب پارے کہ انسداد بدعنوانی مہم 2015ءٹی شروع کننگا ہرا 2016 ءٹی ہم جاری ئِ۔ دا گام گیج آتیان دنیا ٹی ٹرانسپرنسی انٹرنیشنل نا ساڑی آ رپورٹ نا رداٹ پاکستان نا درجہ 126 آن کم مرسا 117 اسکان بسنے ہراکہ اسہ بھلو سرسہبی اسے وخت اس کہ پلڈ اٹ نا رپورٹ نا رداٹ 42درسد الس نیب آ پت کیک۔ نیب آرڈیننس نا رداٹ نیب ئِ دا اختیار ئِ کہ او بدعنوانی نا برخلاف کارروائی کے۔ نیب تینا اڈ ہلنگ آن داوخت اسکان 276ارب روپئی نا ریکوری کرسا قومی خزانہ ٹی جمع کرفے۔ کرپشن نا چٹفنگ کن جنگ قومی ئُ فرض اسے۔ نیب ئِ ملوک آ السی غاو آتے ٹی ودکی نیب آ پت انا درشانی ئِ۔
