ہری پور۔ 19جون (اے پی پی) بے نظیر انکم سپورٹ پروگرام نا چیئرپرسن ماروی میمن پارینے کہ بے نظیر انکم سپورٹ پروگرام پاکستان اٹی تینا وڑانا راجی شرحالی نا غٹ آن بھلا ڈٹ ئِ ہراڑآن پاکستان نا لکھ آ اُراک مستفید مننگ ئُ ، سروے آن دوئی مروک آ معلومداری بنجائی و صوبائی کہول انا پروگرام آتیٹی کمکار ثابت مریک۔ ہنداوڑ جان جوڑی ، تعلیم، فنی و تکنیکی تربیت و بے سود کڑزآتا فراوانی کن ہم دا معلومداری تیان استفادہ دوئی کننگک۔ داخیال آتادرشانی ئِ او کھولیاں بالاٹی اڈ ہلوک بے نظیر انکم سپورٹ پروگرام نا سیل انا وخت آ کرے۔ داوخت آ ممبر تحصیل کونسل حزب اللہ خان ، ممبر ضلع کونسل حاجی نواز خان، طاہر حبیب خان آن بیدس السی نمائندہ غاتا بھلو کچ اس ہم ساڑی ئسک۔ ماروی میمن پارے کہ دا ڈٹ اٹی شفافیت و گچینی ہتنگ کن بین الاقوامی وڑوڈول نا رداٹ پنچ سال پد دُوارہ سروے نا بناءکننگانے۔ ڈٹ انا رداٹ مالی امداد نا حقدار اُراتا گچینی ئِ کننگ کن قومی و راجی اقتصادی سروے نا پن آن رجسٹریشن نا عمل دُوارہ ہندا تو شروع کرینے ہراڑآن بے کچ نیزگار اُراوالا تا کہوک آ چھلا تے لگفنگ اٹی کمک رسینگک۔ سروے ٹی پوسکن ئُ ٹیکنالوجی ئِ کاریم اٹ ہتنگک۔ ماروی میمن پارے کہ مسلم لیگ (ن) نا حکومت داڈٹ اٹی شفافیت ئِ برقرار تخسا نیز گار الس اسکان امداد ئِ رسیفنگ نا عمل اٹی آسانی ودی کننگئِ ، اونا اولیکو مرحلہ ٹی خیبر پختونخوا آن ضلع ہری پور ئِ گچین کننگانے۔ ہرانا چار یونین کونسل آتے ٹی سروے کننگک۔ مسکوہی دور حکومت اٹی بناءمروک آ دا پروگرام کن 2010-11 ءٹی نیزگار شماری سروے نا پن آن سروے نا بناءکننگاسس ہراے بین الاقوامی وڑوڈول نا رداٹ ہر پنچ سال گڈ پوسکن ئُ رجسٹریشن اس کرفوئی مسکہ۔ اوپارے کہ سروے آن دوئی مروک آ معلومداری بنجائی وصوبائی کہول انا پروگرام آتے ٹی کمکار ثابت مریک۔ ہنداوڑ جان جوڑی، تعلیم، فنی و تکنیکی تربیت و بے سود کڑز آتا فراوانی کن ہم دا معلومداری تیان استفادہ دوئی کننگک۔ دورہ نا وخت آ او عملہ نا کاریم نا جاچ ئِ ہلک۔
