اسلام آباد۔ 16جون (اے پی پی) بنجائی وزیر واپار خرم دستگیر خان پارینے کہ حکومت وے پاﺅڈر نا درآمد آ 25درسد ودکی ڈیوٹی خلکونے، دے ٹکی نیامی و ایلو ملک آتے سُو انا برآمد ئِ ودفنگ اُن، درآمدی سُو حلال مننگ کن غٹ تر گرج آتے پورو کننگک، ملک انا بزغر آتا مفادآتا ہر بہاٹی رکھ ئِ کینہ۔ پنچ شنبے آ ایوان بالا ٹی دیوان اٹی سینیٹر میاں عتیق شیخ انا توجوہ ترفوک نوٹس نا ورندی ٹی وزیر واپار پارے کہ وے پاﺅڈر و سو انا درآمد نا معاملہ وزارت رکھ خور انا بابت آن ئِ، درآمدی سو حلال مننگ و اسلامی تعلیمات آتا رداٹ مننگ المی ئِ، گڑاس ملک آتیان سو انا درآمد نا موکل اف۔ اوپارے کہ وے پاﺅڈر نا درآمد آ کسٹم ڈیوٹی 20 درسد و سیلز خراج 12درسد ئِ۔ بجٹ اٹی وے پاﺅڈر آ 25درسد ودکی ڈیوٹی خلنگانے اونا مسخت تینا بزغر آتا مفادآتا رکھ ئِ کننگ نائِ۔ اوپارے کہ حکومت دا چرجوئی ٹی گام گیج کرینے۔ وے پاﺅڈر نا درآمد نا حوصلہ شکنی ئِ کننگ انگ ئِ۔ اوپارے کہ دے ٹکی نیامی و ایلو ملک آتے سو انا برآمد ودنگ ئِ واہم ساہدار تا برآمد آ پابندی برقرار ئِ ۔ حکومت بزغر آتا آسراتی کن غٹ گام گیج آتے کیک۔
