اسلام آباد۔ 13جون (اے پی پی) پاکستان مسلم لیگ (ن) نا راہشون میاں جاوید لطیف پارینے کہ اپوزیشن ئِ ملکی ویل آتا ایسری کن حکومت تون تفوئی مرے۔ اسہ نجی ٹیلی ویژن اسے تون ہیت وگپ کرسا اوپارے کہ حزب اختلاف ئِ مرے کہ او اہم ملکی معاملہ غاتیٹی حکومت نا کسر اٹی اڑاند مننگ آن بیدس ویل آتاایسری کن حکومت تون تفے۔ اوپارے کہ مسلم لیگ (ن) نا حکومت مسکوہی مسہ سال آن گوادر بندرگاہ، پاک چین اقتصادی راہداری ڈٹ، معیشت نا بحالی و پاور پروجیکٹس آ کاریم کننگ ئِ۔ اوپارے کہ پاکستان مسلم لیگ (ن) نا حکومت ملک اٹی غٹ دوئی وسیلہ غاتے کاریم اٹ اتسا معیشت ئِ سوگو جوڑ کننگ کن گام گیج چست کننگ ئِ۔ میاں جاوید پارے کہ حزب اختلاف نا کنڈآن وزیراعظم ئِ ٹی او آرز اٹی اوار کننگ غیر کانودی عمل اسے انتئے کہ وزیراعظم نا پن پانامہ لیکس اٹی اف ہی۔ اوپارے کہ حزب اختلاف نا کنڈآن غلط بیانی آن کاریم ہلنگ انگ ئِ کہ حکومت کرپشن نا چٹفنگ کن گام گیج کپننگ ئِ۔ اوپارے کہ حزب اختلاف تون حکومت نا برخلاف کرپشن نا ثبوت اس ارے تو اودفتے بایدے مون آ اتوئی مرے۔
