اسلام آباد۔17اپریل (اے پی پی): مزن وزیر محمد شہباز شریف ءَ برطانیہ ءَ نندوکیں پاکستانی کمیونٹی ءِ کرد ءَ را ساڑاتگ ءُ گوشت کہ پاکستان ءُ برطانیہ ءِ نیام ءَ پُل ءِ کرد ءَ پیلو کنگ ءَ انت۔ آئی ءَ اے ھیالانی درشانی برطانوی پارلیمانی انڈر سیکرٹری برائے مذہب، کمیونٹیز ءُ آبادی لارڈ واجد خان ءَ گوں گپ ءُ تران کنان ءَ کت آئی ءَ پنچ شمبے ءِ روچ ءَ مزن وزیر گس ءَ آئی ءَ گوں گند ءُ نند کت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ مزن وزیر ءَ لارڈ واجد خان ءَ را پاکستان ءَ آیگ ءِ سر ءَ وش آتک کتگ ءُ اوورسیز پاکستانیز کنونشن ءَ بھر زوری ءِ پد ءَ آئی ءِ شگر ءُ منت گپتگ۔ مزن وزیر ءَ برطانیہ ءَ نندوکیں پاکستانی آنی کمک ءَ را ساڑات کہ آ پاکستان ءُ برطانیہ ءِ نیام ءَ پُل ءِ کرد ءَ پیلو کنگ ءَ اَنت۔ مزن وزیر ءَ بادشاہ چارلس سوم ءِ ھوار برطانیہ ءِ مزن وزیر کیر اسٹارمر ءِ ھم نیکیں واھگ آنی درشان کت۔ آئی ءَ پاکستان ءُ برطانیہ ءِ نیام ءَ بیپار، سرمایہ کاری، وانگ ءُ زانگ ءُ مردم آنی نیام ءَ تبادلہ ءُ ایندگر شوبگ آنی تہ ءَ سیادی ءَ را گیش مھکم کنگ ءِ واھشت ءِ سر ءَ زور پر دات۔ مزن وزیر ءَ پاکستان برطانیہ ءِ سیادی ءَ را دیمروئی دیگ ءُ کمکی ءِ نوکیں راہ آنی شوہازگ ءِ واستہ لارڈ خان ءِ کوشست آناں ساڑات۔ گند ءُ نند ءِ ساھت ءَ لارڈ واجد خان ءَ مزن وزیر ءَ را آئی ءِ گوستگیں چست ءُ ایر ءُ گامگیج آنی بابت ءَ سرپد کت کہ ایشی ءِ مول ءُ مراد پاکستان ءُ برطانیہ ءِ نیام ءَ سیادی ءَ را گیش دیمروئی دیگ اِنت۔
