اسلام آباد۔ 16 اپریل (اے پی پی) وزیراعظم نا خصوصی کمکار صنعت وپیدوار ہارون اختر خان پاکستان انسٹیٹیوٹ آف مینجمنٹ (PIM)انا دورہ ءِ کرے۔ اوداوخت آ ادارہ نا امور آ سرجمی اٹ حوال تننگا۔ حوال اٹی ہارون اختر خان مینجمنٹ و مارکیٹنگ کورس آتے کسبی ادارہ غاتا سوگوی کن بھاز اہم گوندا۔ اوپارے کہ وزیراعظم نا وژن نا رداٹ کسبکار بندغ آک ملک انا شونداری ٹی بنداوی کڑد ادا کیرہ۔ اومستی پارے کہ ہیلکاری ادارہ غاتیٹی آزموندہ کار پروفیشنل آتا ساڑی گری بڑزکو آب انا ٹرینی ودی کننگ کن المی ءِ۔ ورناچین اکن اکاؤنٹنگ ، مارکیٹنگ و فنانس کون آ مضمون آتے ہیل کننگ وخت انا اہم گرج ءِ تانکہ او پوسکن آ دورانا خواست آتون ہم گرنچ مننگ کیر۔ ہارون اخترخان ادارہ ءِ مون تروک مالی نسخان آ گڑتی نا درشانی ءِ کرے و پارت کرے کہ دا ویل انا ایسری کن دمدستی و جوان گام گیج کننگے۔ اوپارے کہ چنکا ونیامی درجہ نا کاروبار (SMEs)نا شونداری کن تربیت بھاز المی ءِ۔ پاکستان انسٹیٹیوٹ آف مینجمنٹ ءِ تینا رسینگ ءِ بایدے ودفے تانکہ زیات آن زیات مخلوق دانا پروگرام تیان فائدہ ہرفنگ کیر۔ پاکستان انسٹیٹیوٹ آف مینجمنٹ داوخت آ السی ٹریننگ پروگرام، کسٹمائزڈ کورس، و پروفیشنل ڈیولپمنٹ ٹریننگ فراوان کننگ ءِ۔ ہارون اخترخان ادارہ نا کچ و کارکڑد ءِ ودفنگ کن پوسکن ءُ پارت جاری کرے تانکہ دا ادارہ قومی شونداری ٹی پین گچین کڑد ادا کننگ کے۔
