اسلام آباد۔ 20جولائی (اے پی پی) بنجائی وزیر انسانی حق سینیٹر کامران مائیکل پارینے کہ پاکستان اٹی ہر بندغ ئِ انفرادی و مذہبی آجوئی دوئی ئِ و غٹ مذہب نا خلقت بے خوف و خلیس تینا مذہبی رسم آتے ادا کننگ کیرہ، رنگ و نسل و مذہب آن ایڑتر مرسا انسانی حق انا پاسداری ئِ کننگ پاکستان نا وطیرہ مسنے، نن اسہ وخت اسے آن قدرتی آفت خاص کر دہشت گردی تون جنگ کرسا بسونن ولے غٹ مون تروک ویل و چیلنج آتا باوجود پاکستان وخت اس ہم انسانی حق انا رکھ آ سمجھوتہ کتنے۔ پنچ شمبے نا دے اے پی پی تون ہیت وگپ کرسا بنجائی وزیر انسانی حق پارے کہ ساڑی حکومت وزیراعظم محمد نواز شریف نا وژن آ عملدرآمد کرسا پاکستان اٹی انسانی حق انا رکھ ئِ المی جوڑ کننگ کن گچین وڑاٹ کوشست کرینے۔ دا چرجوئی ٹی اسہ کڑی اس فروری 2016ءٹی انسانی حق انا بابت تاریخی نیشنل ایکشن پلان نا اڈتننگ ئِ ہرادے سول سوسائٹی تون اوار چندی زند انا بشخ انا خلقت آتا مخ تفی دوئی مس۔ انسانی حق انا بابت نیشنل کمیشن نا اڈتننگ ئِ عمل اٹی اتنگا ہرادے مئی 2015ءٹی فعال کننگا ہرانا مسخت پسماندہ و اختہ مروک آ خلقت ناحق انا رکھ ئِ المی جوڑ کننگ کن عملی گام گیج چست کننگ نا ئِ و داہیت ئِ المی جوڑ کروئی ئِ کہ ہمو غٹ بندغ آک ہرا چندی انسانی حق انا خلاف ورزی تا گواچی مسنو اوفتے دمدستی انصاف مہیا کننگے۔ بنجائی وزیر مستی پارے کہ پاکستان ٹرانس جینڈر بندغ آتا حق انا بابت خصوصی گام گیج چست کننگانے ہراٹی پاکستان نا تاریخ اٹی اولیکو وار ٹرانس جینڈر بندغ آتے شناختی کارڈ جاری کننگا تانکہ او تینے راج انا اسہ فعال باسک اس تکر۔ بنجائی وزیرانسانی حق سینیٹر کامران مائیکل پارے کہ حکومت پاکستان زالبول انا حق انا رکھ و اوفتے معاشی و سیاسی وڑاٹ وت واجہ جوڑ کننگ نا خصوصی گام گیج چست کننگ ئِ ہرانا عملی شاہدی سیاسی و راجی کہول آ زالبول نا پبی نمائندگی آن ملک۔ بنجائی وزیر اُرائی بیدادی، انسداد زناکانود و غیرت نا پن آ خون کون آ واقعہ غاتے شیف خلنگ کن کانود و زالبول کن خصوصی نیشنل کونسل نا اڈتننگ ئِ عمل اٹی اتنگ نا بابت ہیت وگپ کرسا پارے کہ داکونسل نا رداٹ اُرائی بیدادی نا گواچی زالبول ئِ اولیتی بنداو تیا ہروڑنا کانودی و نفسیاتی کمک فراوان کننگ انگ ئِ وخت اس کہ نوعمری نا برام نا واقعہ غاتا سدباب کن فیملی لاءئِ سوگو جوڑ کننگانے۔
