اسلام آباد۔ 20 فروری (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ ملکی فائدہ غاتیکن غٹ بشخ آتے خراج نیٹ اٹی بروئی مریک، پوسکن آ بنجائی بجٹ اٹی ریٹیل تون اوار غٹ بشخ آتا نمائندہ غاتون سلابت نا عمل نا مہالوآن بناءِ کننگانے، مینو فیکچرنگ ، خذمت و تنخواہ دار تپہ غا خراج آتا بھاریم غیرمتناسب ءِ، کشت وکشار، ریئل اسٹیٹ، و ریٹیل نا بشخ آتے ہم تینا کڑد ءِ ادا کروئی مریک، رائٹ سائزنگ نا عمل ریسہ وار بنداو تیا سلابت اٹ مون آ دننگ انگ ءِ۔ اوداخیال آتا درشانی ءِ پنچ شنبے نادے آ داڑے پاکستان ریٹیل بزنس کونسل نا کنڈآن اڈ ہلوک کانفرنس آن تران کرسا کرے۔ وزیرخزانہ پارے کہ آجوزرگزران نا بابت پاکستان سہی کنڈآ ہِننگ ءِ، ملکی کرنسی سوگو ءِ ، زرمبادلہ نا کوڑی تیٹی ودکی مننگ ءِ، داوخت آ اِرا تُو انا درآمد آتیکن زرمبادلہ ساڑی ءِ، افراط زر انا بابت ہم اہم پیش رفت مسنے، پالیسی ریٹ اٹی کمتی بس، کائیبور ہرا 23 درسد اسکان سرمسوسس داسہ 11 درسد نا کچ آ بسنے۔ وزیرخزانہ پارے کہ ڈیٹ و ایکویٹی نا بابت ہم اہم پیش رفت مسنے، جہانی کریڈٹ ریٹنگ نا ادارہ غاتون ننا رابطہ ءِ، درونن ریٹنگ ایجنسی فچ انا نمائندہ غاتون جوان ءُ اوڑدہی مسنے، تدوک آ اسہ سال اٹی پاکستان نا ریٹنگ اٹی گچینی بسنے وانشاء اللہ داسال ہم نن سنگل بی نا کیٹگری دوئی کننگ اٹ سرسہب مرینہ۔ داڑآن پاکستان ءِ فنڈنگ نا ذریعہ غاتے متنوع کننگ و جہانی کیپٹل مارکیٹ آتیٹی دُوارہ پدی اتنگ اٹ کمک رسینگک۔ وزیرخزانہ پارے کہ زرگزران ءِ پین گچینی و مون آ دننگ کن پامدارانہ گام گیج آتا چرجوئی برجاءِ انتئے کہ نن پین بوم اینڈ بسٹ سائیکل ءِ سگنگ کپنہ۔ پائیدار و جوان نمو ننا ہدف ءِ، ننا چکار پنجرجاتی اصلاحات آٹی ءِ، ہرافتیا مہالو آن عملدرآمد مننگ ءِ ، توانائی ، ٹیکسیشن ، ایس اوایز، سرکاری مالیات و خڑچ آتیٹی اصلاحات مننگ ءِ۔ ٹیکسیشن نا بشخ اٹی بھلو بدلی اس بننگ اٹی ءِ، ایف بی آر نا اینڈ ٹو اینڈ ڈیجیٹلائزیشن مننگ ءِ، داڑآن لیکج آتیٹی کمتی و شفافیت ءِ پک کننگ مریک۔ کسٹم اٹی فیس لیس انٹرایکشن بناکرینے ، اونا کمک اٹ داسہ 80 درسد درآمد آتیا پروسیس مننگ ءِ، گڑاتا کلیئرنگ نا وخت 120 گھنٹہ غان کم مرسا 18 آن 19 گھنٹہ مسنے، نن خراج انتظامیہ غا پت و اوفتا ساکھ انا بحالی ءِخوانہ۔ وزیراعظم تینٹ دا باندات نا چاروکی ءِ کننگ ءِ۔ اوپارےکہ توانائی نا بشخ اٹی ہم اصلاحات مننگ ءِ، مسابقتی توانائی کن نن سخت فیصلہ کرینن، ہندا وڑ سرکاری ملکیتی ادارہ غاتیٹی ہم اصلاحات مننگ ءِ، رائٹ سائزنگ نا عمل ریسہ وار بنداو تیا سلابت ءِ مون آ دننگ انگ ءِ۔ داوخت آ رائٹ سائزنگ نا چارمیکو ریسہ ٹی 20 وزارت آتا جاچ ءِ ہلنگ انگ ءِ و جون نا ایسر اسکان دا عمل ءِ پورو کننگک۔ وزیرخزانہ پارے کہ ہنداوڑ نجکاری نا عمل ءِ ہم مون آ دننگ انگ ءِ، ننے گڑاس مشکل پیش بسنے، پی آئی اے نا نجکاری نا عمل نا دُوارہ بناءِ کننگک۔ وزیرخزانہ پارے کہ ریٹیل بشخ انا ملکی جی ڈی پی ٹی اہم ءُ کڑد اسے ولے خراج نا بشخ اٹی اونا کڑد کم ءِ، داوخت آ مینو فیکچرنگ، خذمت وتنخواہ دار تپہ غاخراج آتا بھاریم غیرمتناسب ءِ، داپائیدار وڑاف، کشت وکشار، ریئل اسٹیٹ وریٹیل نا بشخ آتے ہم تینا کڑد ءِ ادا کروئی مریک، کشاری انکم خراج نا بابت پیش رفت ستاکڑزک، ریٹیل تون اوار غٹ بشخ آتیٹی فارمل و نان فارمل نا درجہ بندی ساڑی ءِ۔ وزیرخزانہ پارے کہ ملکی فائدہ غاتیکن غٹ بشخ آتے خراج نیٹ اٹی بروئی مریک، ننے زرگزران ءِ دستاویزی جوڑ کروئی مریک، ڈیجیٹلائزیشن آن زرگزران ءِ دستاویزی جوڑ کننگ اٹ کمک رسینگک۔ وزیرخزانہ پارے کہ حکومت ریٹیل نا بشخ ءِ غٹ آسراتی فراوان کیک، ولے ریٹیل نا بشخ ءِ ہم تینا کڑد ءِ ادا کروئی مریک ، داسال پوسکن آ بنجائی بجٹ اٹی ریٹیل تون اوار غٹ بشخ آتا نمائندہ غاتون سلابت نا عمل مہالوآن بناکننگانے تانکہ دا سلا ہ تا جوان وڑاٹ جاچ ءِ ہلنگ مرے۔ اوپارے کہ خراج پالیسی آفس ءِ ایف بی آر نا جاگہ غا وزارت خزانہ نا رداٹ کننگانے، دااہم پنجرجاتی بدلی ءِ، ایف بی آر نا چکار داسہ بیرہ محصولات آتا وصولی آ مریک۔
