اسلام آباد۔ 13 جنوری (اے پی پی) روشن ڈیجیٹل اکاؤنٹس نا کمک اٹ سمندر پار پاکستانی تا زر راہی تس 9.342 ارب ڈالر آن گدرینگانے۔ اسٹیٹ بینک انا کنڈآن جاری کروک حساب وکتاب نا رداٹ دسمبر اٹی سمندر پار پاکستانیک روشن ڈیجیٹل اکاؤنٹس آتا کمک اٹ 203 ملین ڈالر نا زرمبادلہ ملک آ مون تسر اوکان پد ستمبر 2020 آن پد آن ہلیس داتم اسکان روشن ڈیجیٹل اکاؤنٹس نا کمک اٹ سمندر پارپاکستانی تا زر راہی تس نا کچ 9.342 ارب ڈالر آن گدرینگانے۔ حساب وکتاب نا رداٹ روشن ڈیجیٹل اکاؤنٹس نا کمک اٹ سمندر پار پاکستانیک دسمبر اٹی پاکستان اٹی 78 ملین ڈالر نا زرکاری کریر اوکان پد روشن ڈیجیٹل اکاؤنٹس آتا کمک اٹ سمندر پار پاکستانی تا جم زرکاری نا کچ 1.267 ارب ڈالر مسنے۔ سمندر پار پاکستانیک نیا پاکستان روایتی سرٹیفکیٹ اٹی 460 ملین ڈالر، نیا پاکستان اسلامی سرٹیفکیٹ اٹی 748 ملین ڈالر و روشن ایکویٹی انویسٹمنٹ اٹی 59 ملین ڈالر نا زرکاری کرینو۔
