توانائی نا جوان نہاد آ بے سلنگ آن فراوانی حکومت نا اولیت، موسمیاتی بدلی تے توننگ کن ہم کاریم کروئی ءِ، بنجائی وزیر پیٹرولیم مصدق ملک

اسلام آباد۔ 22 مئی (اے پی پی) بنجائی وزیر پیٹرولیم مصدق ملک پارینے کہ توانائی نا جوان نہاد آ بے سلنگ آن فراوانی حکومت نا اولیت، توانائی نا فراوانی ءِ ودفنگ نا کوشست کننگ اُن، پاکستان ءِ موسمیاتی بدلی تیان بھاز زیات مشکل مون تروک ءِ، ننے موسمیاتی بدلی تے توننگ کن کاریم کروئی ءِ۔ داخیا ل آتا درشانیءِ او چارشنبے نادے آ  پاکستان پیٹرولیم سمپوزیم آن تران کرساکرے۔ اوپارےکہ پاکستان توانائی نا درآمد آ سالانہ 18 ارب ڈالر آن زیات خڑچ کننگ ءِ، ملک اٹی تیل و گیس انا پٹنگ نا کاریم ءِ ترند کننگ اُن، درملکی کمپنی تے ملک اٹی زرکاری کن بخیر اٹ پانہ۔ وزیر پیٹرولیم پارے کہ تیل و گیس انا پٹنگ اٹی زرکاری ءِ بھاز آسان و دابارواٹی معلومداری و موکل نامہ غاتے ڈیجیٹلائزکننگانے۔ اوپارےکہ اوغانستان نا حالیت آتا سوب آن تاپی گیس پائپ لائن ڈٹ اٹی تاخیرمس، نیامی ایشیانا گیس گوادر اٹی ایل این جی ٹی منتقل کرسا مچ آ دنیاٹی بہاکننگ مریک۔ مصدق ملک نا پاننگ ئس کہ پاکستان اٹ باسنی ٹی بجلی نا طلب 35 ہزار میگاواٹ اسکان وخت اس کہ موسم سرماٹی کم مرسا 10 ہزار میگاواٹ مریک۔ اوپارے کہ بجلی نا ٹیرف ٹی کمتی کن چندی سلاہ تیا کاریم برجاءِ، ایفیشیٹ پاور پلانٹ آتے ہندی گیس انا فراوانی آن بجلی نا خڑچ 12 روپئی فی یونٹ اسکان مریک۔