چینی بندغ آتا سیکورٹی و رکھ ننا اولیت ءِ، احسن اقبال

اسلام آباد۔ 21 مئی (اے پی پی) بنجائی وزیر ڈٹ بندی، شونداری، اصلاحات و گام گیج احسن اقبال پارینے کہ چینی بندغ آتا سیکورٹی و رکھ ننا اولیت ءِ، کوشست کینہ کہ معدنیات کوریڈور نا معاہدہ دا جے سی سی ٹی طے مرے، ایم ایل ون نا وخت آ بناءِ کننگ کن باقاعدہ ٹائم لائن نا تعین ءِ کننگے۔ داخیال آتا درشانی ءِ او تینا کماشی ٹی سی پیک فیز 2 و 13 می جوائنٹ کوآپریشن کمیٹی نا جاچ دیوان اٹی کرے۔ دیوان اٹی سیکرٹری ڈٹ بندی اویس منظور سمرا، ایڈیشنل سیکرٹری وزارت ڈٹ بندی ، چندی وزارت آتا بڑزکو کمامدارو بنجائی و صوبائی وزارت آتا نمائندہ غاک بشخ ہلکر۔ دیوان اٹی دا ہفتہ آن لائن اڈ ہلوک جے سی سی نا تیاری تیا وزارت آتا بڑزکو کمامدارآتے سرجمی اٹ حوال تننگا۔ دیوان اٹی مواصلات، سیکورٹی، انفراسٹرکچر، توانائی و اقتصادی شونداری و کشت وکشار نا ڈٹ آتیا گپ وتران کننگا۔ دیوان اٹی احسن اقبال پارے کہ نن چینی بندغ آتے سیکورٹی فراوان کننگ کن ہروڑنا لائحہ عمل اس تیار کرینن۔ چینی بندغ آتا سیکورٹی و رکھ ننا اولیت ءِ۔ اوپارے کہ کوشست کینہ کہ معدنیات کوریڈور نا معاہدہ دا جے سی سی ٹی طے مرے۔ ایم ایل ون کن بڈنگ نا عمل نابناءِ کننگے۔ ایم ایل ون نا وخت آ بناءِ کننگ کن باقاعدہ ٹائم لائن نا تعین ءِ کننگے۔ بنجائی وزیر پارے کہ معدنیات نا سب ورکنگ گروپ آتا زوت آن زوت چینی کمامدارآتون میٹنگ کرفنگے۔ ہندا ٹی معدنیاتی راہداری نا ڈٹ آتیا شرہ کننگے۔