بنجائی کابینہ ایرانی صدر، وزیرخارجہ و اونا سنگت آتا ہیلی کاپٹر شکست اٹی شہیدی آ ہڑزخواہی قرارداد منظور کرے، ابراہیم رئیسی جید عالم و صاحب بصیرت راہشون اس ئس، پاکستان مخلص و ایلم کون ءُ سنگت اس گوہا، وزیراعظم

اسلام آباد۔ 21 مئی (اے پی پی) بنجائی کابینہ ایران نا صدر ڈاکٹر سید ابراہیم رئیسی، ایرانی وزیرخارجہ حسین امیر عبداللہیان و اونا سنگت آتا ہیلی کاپٹر شکست اٹی شہیدی آ ہڑزخواہی قرارداد منظور کرسا پاک ایران تعلقداری و ڈیہہ انا بابت خذمت آتیا ڈاکٹر سید ابراہیم رئیسی ءِ خراج عقیدت پیش کرینے وخت اس کہ وزیراعظم شہباز شریف پارے کہ ابراہیم رئیسی جید عالم و صاحب بصیرت راہشون اس ئس، پاکستان مخلص و ایلم کون ءُ سنگت اس گوہا۔ سے شنبے نادے آ بنجائی کابینہ نا دیوان وزیراعظم محمد شہباز شریف نا کماشی ٹی مس ۔ دیوان اٹی ایرانی صدر، وزیرخارجہ و اونا سنگت آتیکن بخشش نا دعاہم کرفنگا۔ قرارداد اٹی پاننگانے کہ پاکستان نا حکومت و الس ءِ اسلامی جمہوریہ ایران نا صدر ڈاکٹر سید ابراہیم رئیسی و ایرانی وزیرخارجہ حسین امیر عبداللہیان و اونا ایلو سنگت آتا است ہسون شکست اٹ شہیدی نا خبرآن بھاز صدمہ مسنے۔ نن ڈکھیائی و غم انا داساہت اٹی پدسلوک خاہوت و اسلامی جمہوریہ ایران نا الس تون ہڑزخواہی نا درشانی ءِ کینہ۔ ننا غٹ تر ہمدردی شہیدی آتا خاہوت و ایرانی الس تون ءِ۔ مچ آ پاکستانی قوم مشکل نا داساہت اٹ ایلم ملک ایران تون سلوک ءُ۔ دابابت بنجائی کابینہ نا دیوان آن تران کرسا وزیراعظم پارے کہ ایرانی صدر ڈاکٹر سید ابراہیم رئیسی اسہ جید عالم و صاحب بصیرت راہشون اس ئس۔ پاکستان ڈاکٹر ابراہیم رئیسی کون ءُ مخلص و ایلم کون ءُ سنگت اس گوہا۔ وزیراعظم ڈاکٹر سید ابراہیم رئیسی ءِ خراج عقیدت پیش کرساپارے کہ ڈاکٹرابراہیم رئیسی نا تینا قوم اتون اوار اوار پاکستان ایران تعلقداری و علاقائی کمکاری نا مون آ دننگ کن خذمت آتے مدام یات تخنگک۔ اوپارے کہ تدوک آ تُو ڈاکٹر ابراہیم رئیسی نا دورہ ءِ پاکستان ننا ہڑتوم آ کنڈآتا تعلقداری تے پین سوگو و محکم کننگ نا بابت اسہ اہم ءُ مزل نا نشان اس ئس۔ ایرانی صدر نا دورہ ءِ پاکستان اٹی پاکستانی الس تون گدرینگوک آ وخت آتے مدام یات تخنگک۔ کابینہ نا کنڈآن منظور کروک قرارداد اٹی داعزم انا درشانی ءِ کننگا کہ ایماندار صدر ڈاکٹر سید ابراہیم رئیسی نا پاک۔ ایران تعلقداری نا سوگوی و مو ن آ دننگ نا وژن ءِ برجاتخنگک۔ کابینہ دعاکرے کہ اللہ تعالیٰ ایرانی صدر ڈاکٹر سید ابراہیم رئیسی، ایرانی وزیرخارجہ و اونا سنگت آتے جنت الفردوس اٹی بڑزکو ہند اس عطاکے۔