تہران۔ 01 اپریل (اے پی پی) ایران نا صدر ابراہیم رئیسی ترک ہم منصب رجب طیب اردوان تون فون آ گپ وتران کرے ہراٹی ہڑتوم آکنڈآتا تعلقداری تے ودفنگ و غزہ نا تنکی تون مون تننگ کن عملی گام گیج آتیا زور شاغا۔ شنہوا ایرانی صدر نا دفتر نا ویب سائٹ آ شینک مروک آ اسہ بیان اسے نا بابت پارے کہ ہڑتوم آ فریق آتیکن سیاسی، اقتصادی و دودوربیدہ ئی تعلقداری تے پین سوگو کننگ المی ءِ۔ اوتوانائی نا بشخ اٹی ترکیہ تون ہڑتوم آ کنڈآتا کمکاری ءِ ودفنگ کن آمادگی نا درشانی ءِ کرسا اومیت ظاہر کرے کہ دا کمکاری ہڑتوم آ ملک آتا فائدہ غاتا رکھ و مسلم دنیا ٹی سیوت و یکجہتی ءِ مون آ دننگ اٹ کمکاری جوڑ مریک۔ ابراہیم رئیسی غزہ جھیڑہ نا بابت پارے کہ اسرائیل اقوام متحدہ نا سلامتی کونسل نا کنڈآن روچہ مبارک اٹی کرکی علاقہ غاتیٹی دمدستی جنگ بندی نا خواست کننگ نا قرارداد آتیان پد ہم غزہ ٹی تینا فوجی کارروائی تے برجاتخسا جہانی کانود نا خلاف ورزی ءِ کرینے۔ ایرانی صدر اسلامی کمکار تنظیم تون اوار اوار ایلو علاقائی و جہانی تنظیم تا فریم ورک نا تہہ ٹی مسلم ملک آتا نیام اٹ زیات ہم گرنچی، کمکاری و سیوت آ زور شاغا تانکہ غزہ نا مخلوق نا کمک ءِ کننگ مرے و داپٹی ٹی انسانی ہمدردی نا بنداو آ امدا د گدریفنگ مرے۔
