کوئٹہ۔ 01 اپریل (اے پی پی) پاکستان پیپلزپارٹی کوئٹہ ڈویژن نا صدر خیرمحمد ترین ضمنی گچین کاری تیٹی بے مقابلہ غان سرسہبی آ آصفہ بھٹو و بلوچستان آن سینیٹر آتے بے مقابلہ غان گچین مننگ آ مبارکبادی پیش کرساپارینے کہ این اے 207 آن آصفہ بھٹو نا بے مقابلہ غان سرسہبی سندھ انا الس نا پیپلزپارٹی آ پبی پت انا درشانی ءِ ، صدر آصف علی زرداری ، چیئرمین بلاول بھٹو و آصفہ بھٹو ءِ مبارکبادی پیش کینہ، بلوچستان آن پوسکن گچین مروک آسینیٹرآک سینیٹ اٹی بلوچستان نا الس نا سہی وڑاٹ نمائندگی ءِ کیرہ۔ داڑے جاری مروک اسہ بیان اسے ٹی خیرمحمد ترین پارے کہ قومی سیاست آن پد پارلیمانی سیاست اٹی عکس بے نظیر آصفہ بھٹو شہید بے نظیر بھٹو آنبار ملک و قوم انا توار جوڑ مریک۔ اوپارے کہ قومی اسمبلی نا حلقہ این اے 207 نا ضمنی گچین کاری تیٹی آصفہ بھٹو زرداری نا بے مقابلہ غان سرسہبی پیپلزپارٹی نا السی مقبولیت نا شاہدی ءِ، آصفہ بھٹو زرداری پارلیمانی سیاست اٹ شہید بے نظیر بھٹو نا جہد نا آئینہ دار ثابت مریک۔ اوبلوچستان آن سردار عمر گورگیج، شیخ بلال مندوخیل تون اوار ایلو سینیٹر آتے بے مقابلہ غان گچین مننگ آ مبارکبادی ترساپارے کہ وزیراعلیٰ بلوچستان و ایلو پارلیمانی سیاسی جماعت آتا سرکڑدہ غاک اواری اٹ تولسا بلوچستان آن سینیٹ نا 11 نشست آتیا غٹ سینیٹر آتے بے مقابلہ غان گچین کرفیر ہراڑآ او مبارکباد نا حقدار ءُ۔ اواومیت ظاہر کرے کہ بلوچستان آن پوسکن گچین مروک آ سینیٹر آک سینیٹ اٹی بلوچستان نا الس نا سہی وڑاٹ نمائندگی ءِ کرسا صوبہ نا ویل آتے نئے بیرہ تالان کیرہ بلکن اوفتا ایسری ٹی ہم تینا کڑد ءِ ادا کیرہ۔
