بیجنگ۔ 01اپریل (اے پی پی) بنجائی وزیر سمندر پار پاکستانی و ہیومن ریسورس ڈویلپمنٹ چوہدری سالک حسین چین نا حکومت و الس تون یکجہتی نا درشانی ءِ کننگ کن دوشنبے نادے آ خصوصی جہاز انا کمک اٹ دہشت گردانہ جلہو اٹی زوال کروک آ پنچ چینی کارندہ غاتا میت آتون اوار چین نا شار ووہان آ سرمس۔ بنجائی وزیر داوخت آ زوال کروک آ کارندہ غاتے خراج عقیدت پیش کننگ کن اڈ ہلوک خصوصی دود اٹی ہم بشخ ہلک۔ داکان مست بنجائی وزیر نا ووہان نا بالی پٹ آ بڑزکو سرکاری کمامدار وپاکستانی سفارت خانہ نا نمائندہ غاک بخیرکریر۔ اوکان پد بنجائی وزیر صوبہ ہوبی نا نائب گورنر چن پنگ تون اوڑدہی کرے و کودک جان تا زیان آ ڈکھ و غم نا درشانی ءِ کرسا دا گندہ انگا ڈوہ انا ارتکاب کروک آ ڈوہدار تے اوفتے اوفتا کروک نا سزا تننگ ن پاکستان نا پکا عزم انا درشانی ءِ کرے۔ بنجائی وزیر پاکستان نا شونداری و پیش رفت اٹی انمول شریداری آ چینی کارندہ غاتے زبردست خراج عقیدت پیش کرے و دا عزم انا درشانی ءِ کرے کہ پاکستان نا حکومت و الس پاک چین تعلقداری نا برخلاف ناپاک ڈٹ آتے اسُل سرسہب مننگ کن اِلیپک۔ چینی انجینئرآک 26 مارچ آ شانگلہ ٹی دہشت گرد آتا جلہو اٹی خلنگاسر۔
