اسلام آباد۔ 20 نومبر (اے پی پی) صدر مملکت ڈاکٹر عارف علوی پارینے کہ چناک ہر قوم انا غٹ آن نہادی سرمایہ و اونا آخبت نا اسٹ انگا ضمانت ءُ، پاکستان تینا چناتا کنڈآ تینا زمواری تیان پورو وڑاٹ بلد ءِ و دستورِ پاکستان و اقوام متحدہ نا چناتا حق انا کنونشن نا رداٹ چناتا جوان شونداری، اندراجِ پیدائش، تعلیم، جان جوڑی ، شرکت ، وقار و رکھ ءِ پک کننگ کن غٹ کوشست آتے کننگ ءِ، راجی انصاف و بریبری ہی ہمو بنداو آک ءُ ہرافتیا اسہ جان جوڑ راج اسے نا پنجر ءِ بایدے استوار کننگے، داڑکن ننے راجی کہول آ اسہ تحریک اسے نا گرج ءِ، کمیونٹی و خاہوت آتے ننا قوم انا آخبت کن تینا کڑد ءِ ادا کروئی مریک۔ چناتا جہانی دے آ صدر مملکت ڈاکٹر عارف علوی تینا کلہو اٹی پارے کہ اینو چناتا جہانی دے ’’ ہر چناکن ہر حق‘‘ نا سرحال نا رداٹ اڈتننگ انگ ءِ ، اینونادے نن چناتا حق و آسودہی کن تینا عزم انا درشانی ءِ کینہ، پاکستان اقوام متحدہ نا چناتا حق انا کنونشن تون اوار انسانی حق انا ہفت بنداوی کنونشن تیا دستخط کرینے۔ پاکستان چناتا ہل و تس، جسم فروشی، پورنوگرافی و جنگ آتیٹی چناتا اوار ی نا بابت اختیاری پروٹوکول ءِ ہم پک کرینے، اقوام متحدہ نا چناتا حق انا کنونشن آ اسہ دستخط کنندہ سے نا وڑاٹ پاکستان چناتا حق انا وکالت ، رکھ و مون آ دننگ اٹ صفِ اول اٹ اوار ءِ۔ اوپارے کہ پاکستان اٹ چناک ذہنی وجونی نشوونماٹی کمتی، غذائیت نا کاختی و آب اٹ تعلیم و جان جوڑی نا آسراتی اسکان رسینگ پننگ کون آ کیہی چیلنج آتا گواچی ءُ۔ داکان بیدس اوفتے چناتا اسمگلنگ ، برام ، چائلڈ لیبر، جونی سزا، بدسلوکی، کانود تون تصادم و نسخان دہ راجی روایت کون آ رکھ انا چندی چیلنج آتا ہم مون تروک ءِ۔ اوپارے کہ پاکستان آئی سی ٹی چائلڈ پروٹیکشن ایکٹ 2018ء، جووینائل جسٹس سسٹم ایکٹ 2018ء، زینب الرٹ ریسپانس اینڈ ریکوری ایکٹ 2020ء و چناتا ملازمت نا ایکٹ 1991ء ٹی کسب آتا لڑاٹی ’’ چائلڈ ڈومیسٹک لیبر‘‘ ءِ اوار کننگ تون اوار کانود جوڑ کرینے۔
