اسلام آباد۔ 19 نومبر (اے پی پی) خاتون اول بیگم ثمینہ علوی پارینے کہ پاکستان اٹ ہرسال کم وود 44000زالبول سینہ نا کینسر نا ہرے آ تشخیص نا سوب آن مرک انا باہ ٹی کارہ، اگہ دانا تشخیص مرے تو 98 درسد اسکان زندہ مننگ نا گمان مریک ہنداوڑہزار آ زالبول و اوفتا خاہوت آتے بچفنگ مریک، پاکستان اٹ دا ناجوڑی نا بنائی نشانی تا بارواٹی آگاہی نا کمتی ءِ۔ دا ناجوڑی چپی اٹ تالان مرسا کننگ ءِ و جان ہلوک جوڑ مننگ ءِ۔ او یک شنبے نادے آ پاکستان فارن آفس ویمنز ایسوسی ایشن (پفوا) نا سالانہ چیریٹی بازار نا وخت آ تران کریکہ۔ داوخت آ اسلام آباد نا رہینگوک سفارت کارآتا بیگم آک تینا تینا ملک آتا دودوربیدہ ، کُن و خور و فن پارہ غاتا عکاسی ءِ کروک آ اسٹالز خلکر۔ چیریٹی بازار آن دوئی مروک آکٹیا ءِ وزارت خارجہ نا کم کٹیا کروک ملازم آتا راجی آسودہی کن کاریم اٹ اتنگک۔ خاتون اول بیگم علوی پارے کہ او سینہ نا کینسر نا بابت اسہ جوان و ملک گیر آگاہی مہم اسے نا بناءِ کرینے۔ ننا مون آ اسہ بھلو چیلنج اس ملک انا مر مر انگا علاقہ غاتیٹی رہینگوک آ زالبول اسکان تینا کلہو ءِ سرکننگ ئس۔ پاکستان اٹ کینسر نا زیات تر کیس مسٹ میکو یا چارمیکو سٹیج اٹ رپورٹ مس ہرانا سوب آن نئے بیرہ درمان تکلیف دہ و کبین مس بلکن دانا بچنگ نا گمان ہم کم مس۔ اوپارے کہ داکان بیدس ننا ملک اٹی میموگرافی، الٹراساؤنڈ واسکریننگ نا آسراتی نا کمتی ءِ یا دا آسراتی بھاز کبین ءِ۔ معذور چنا و سینہ نا کینسر نا ویل آتا زوت ڈس ءُ نشان ءِ خلنگ نا اہمیت نا ذکر ءِ کرسا اوپارے کہ دا گام گیج بھاز اہمیت تخک، انتئے کہ داٹی بھاز انگا زند آتے بچفنگ نا لائخی ساڑی ءِ۔
