اقوام متحدہ۔ 27 ستمبر (اے پی پی) اقوام متحدہ نا جنرل اسمبلی نا سالانہ بڑزکو کہولی دیوان ایسر مس، ہراٹی پاکستان نا نگران وزیراعظم انوارالحق کاکڑ تون اوار مچ آ دنیا غان کم و ود 88 سروک مملکت، 42 سروک حکومت و 650 آن زیات وزیر بشخ ہلکر۔ دیوان اٹی چاگڑدی بدلی، مصنوعی ذہانت نا غلط کاریم اٹ اتنگ کون آ چیلنج آتے تالان کننگا۔ جہانی راہشونک داہیت آ زور شاغار کہ ادارہ جاتی چیلنج آتیان پد ہم اقوام متحدہ انسانیت ءِ مون تروک چیلنج آتا اجتماعی ایسر اس تیار کننگ کن غٹ آن بھلا پلیٹ فارم ءِ۔ دیوان اٹی بشخ ہلنگ کن مچ آ دنیا غان بروک آ راہشونک داوخت آن فائدہ ہرفسا اِرا ہزارآن زیات ہڑتوم آکنڈآتا میٹنگ آتیٹی بشخ ہلکر۔ داکان بیدس 13 ہزار آن زیات ملکی مندوبین، میڈیانا 2،600 باسک و 40 ہزار آن زیات ایلو بشخ ہلوک آک لس شرہ و اوڑتون وابستہ اسہ سد آن زیات ایونٹ آتیٹی بشخ ہلکر۔ ایس ڈی جی ایکشن ویک اینڈ سول سوسائٹی، کاروباری ادارہ ، ورنا، سائنسدان، ہندی و علاقائی حکومت و ایلو اسٹیک ہولڈر آتے 2030 نا ایجنڈا ءِ پورو کننگ کن مربوط کوشست آتے متحرک کننگ کن یکجا کرے۔ جنرل اسمبلی نا صدر ڈینس فرانسس تینا ایسری تران اٹی مچ آ دنیا نا مخلوق ءِ امن، شونہالی، شونداری و پائیداری فراوان کننگ کن اقوام متحدہ نا بدل مفروک عزم ءِ مون آ تخا۔ اوپارے کہ دا پیش رفت اسہ ستاکڑزوک یات دہانی اسے کہ اقوام متحدہ نا چکار ننا وخت انا اجتماعی چیلنج آتیاٹی ءِ۔ فرانسیسی صدر جھیڑہ غاتیٹی اوار اقوام و گروہ تا نیام اٹ امن و سنگتی نا مکالمہ ءِ آسان کننگ اٹ تینا کنڈآن کمک نا سلہ خلک۔ اقوام متحدہ نا ڈپٹی سیکرٹری جنرل امینہ محمد پارے کہ دُن تو ننتون وسیلہ غاتا کمتی ءِ ولے ہندا ہمو سوب ءِ ہراڑکن نن پائیدار شونداری نا ہدف آتا دوئی کننگ کن کوشست آتے ترند کننگ آ زور شاغنگ اُن۔
