کوئٹہ۔ 20 ستمبر (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امورنا ماہر سینیٹر محمد عبدالقادر اسہ خصوصی ءُ بیان اسے ٹی پارینے کہ ترکی بھارت دے ٹک نیامی واپاری راہداری ڈٹ انا گیگ بدل اس پیش کرینے، عراق ڈویلپمنٹ روڈ انیشی ایٹیو ڈٹ آ عراق، قطر و متحدہ عرب امارات تون ترکی نا گپ وتران برجاءِ، امریکہ و یورپی یونین نا اشیر باد آن جی 20 نا بھارت آن مجوزہ وڑاٹ بناکروک آ کوریڈور دُن تو بے کچ اہمیت تخک ولے چونکہ امریکہ و یورپ ترکی تون عناد تخرہ ہندا سوب آن او بھرت والا کاریڈور اٹ ترکی ءِ بھاز بے وڑ گوجالانو، ہرانا ترک صدر رجب طیب اردگان بھا ززیات خراب منانے، دُن تو او ترکی، عراق و متحدہ عرب امارات کوریڈور نا پرپوزل تسنے ہرانا عراق و متحدہ عرب امارات ستاءِ کرینو ، اوپارے کہ ترکی ءِ گوجالسا اسہ ہم علاقائی کوریڈور اس سرسہب مننگ کپک ۔ ترک صدر رجب طیب پارینے کہ اگہ بھارت آن بناکروک آکوریڈور ترکی آن گدرینگپک تو ترکی اونا سرسہبی نا ضمانت ءِ تننگ کپک، ترکی، عراق، قطر متحدہ عرب امارات مجوزہ کوریڈور کن بنائی وڑاٹ 17 ارب ڈالر نا فنڈ آتیا اتفاق مسنے، دا سلاہ ئی کسر 1200 کلومیٹر ریل و متوازی سٹرک نا نیٹ ورک آ انحصار کیک، ترک صدر رجب طیب اردگان پارے کہ دے ٹک آن دیکی اسکان واپار کن جوان انگا کسر ترکی آن بایدے گدرینگے، ترکی علاقائی شریدارآتون گیگ بدل راہداری نا بارواٹی سنجیدگی اٹ ہیت کننگ ءِ، او بھارت، دے ٹک نیامی نا سلاہ ئی کسر نا برخلاف تینے پدی کرینے، چین نا اثرورسوخ ءِ کم کننگ نا کوشست اٹی امریکہ و یورپی یونین نا حمایت یافتہ کوریڈور ترکی ءِ پورو وڑاٹ گوجالک۔ چیئرمین قائمہ کمیٹی پارے کہ ترکی نا واپاری کسر نا مطلب بیرہ واپار مفک ، دا جیو اسٹریٹجک مقابلہ و اہمیت نا ڈیک ءِ ہم ایتک، ترکی اونا جاگہ غا عراق ڈویلپمنٹ روڈ انیشی ایٹونا پن اٹ اسہ گیگ بدل اسے آ کاریم کریے، عراق، قطر ، متحدہ عرب امارات نا نیام اٹ گپ وتران برجاءِ ہرادے بروک آ منہ تُواٹی پین میچور کننگک، عراق نا کنڈآن جاری کروک ڈیزین نا رداٹ 17 ارب ڈالر نا سلاہ ئی کسر سویلی عراق نا گرینڈ فاوبندرگاہ آن دہ عراقیصوبہ غاتیان مرسا ترکی اسکان گڑادیک۔ دااسکیم نا مسہ ریسہ ءُ، ہرانا اولیکو ریسہ 2028ٹی و آخریکو 2050 اٹ پورو کروئی ءِ، دا کوریڈور نا سرسہبی ٹی قطر و متحدہ عرب امارات نا اہم ءُ کڑد اس مریک، ترکی چین نا بیلٹ اینڈ روڈ انیشی ایٹیو ڈٹ انا مخ تف ءِ، پاکستان و ایران دا ڈٹ ٹ اوار مرسا بھاز فائدہ ہرفنگ کیرہ۔
