اسلام آباد۔ 15 ستمبر (اے پی پی) نگراں وزیراعظم انوارالحق کاکڑ تینا دا عزم انا درشانی ءِ کرینے کہ حکومت لمہ وطن نا اسہ اسہ انچ انا دفاع ءِ کیک و دیکی و دے ٹکی سیم تیا ہرپاکستانی شاری نا رکھ ءِ کیک۔ پنچ شنبے نادے آ نجی ٹی وی چینل اسے انٹرویو ترسا اوپارے کہ نن تینا گل زمین نا اسہ اسہ انچ انا دفاع ءِ کینہ و ہرپاکستانی نا رکھ ءِ کننگ نا کوشست کینہ۔ ننے داموقف نا درشانی ٹی ہچ ءُ شک یا خوف اس اف۔ کس اسے غلط گمانی اس مف۔ اوپارے کہ الیکشن کمیشن آف پاکستان ءِ تینا چٹھی نا کمک اٹ صدر عارف علوی لس گچین کاری تا بارواٹی فیصلہ آخا بلکن بیرہ اسہ سلاہ اس تسوسس و عدالتی فیصلہ اسکان اونا چٹھی نا ہچ ءُ کانودی پابند اس اف۔ اوپارے کہ نگراں حکومت شفاف وڑاٹ گچین کاری تا اڈتننگ نا عمل اٹ کمکاری کن ساڑی ءِ۔ گچین کاری تا تاریخ نا فیصلہ ءِ کننگ نا واکداری تا جھیڑہ نا بارواٹی ، وزیراعظم پارے کہ پارلیمنٹ اسہ کانود اس منظور کرینے ہرانا صدر ہم منظوری ءِ تسوسس۔ اوپارے کہ دُن تو داسکان ہچ ءُ عدالتی نتیجہ اس پیش تمتنے، حکومت مروجہ کانود نا پابند ءِ۔ نیب کانود اٹی ترمیم نا باندات آتیا وزیراعظم پارے کہ پارلیمنٹ ءِ کانود سازی نا کانودی حق دوئی ءِ۔ اوپارے کہ کانود و آئین نا تشریح ءِ کرسا عدلیہ ءِ ہم توازن ءِ برقرار تخے تانکہ ایلو ادارہ غاتا واکداری ٹی نیام تمنگ آن بچنگ مرے۔ دہشت گردی و زرگزرانی چیلنج ءِ پاکستان کن خطرہ گوندسا وزیراعظم پارے کہ بروک آ گچین کاری تیٹی او زرگزرانی بحالی نا ایجنڈا تخوک آ سیاسی جماعت ءِ وونٹ ایتک۔ نگراں سیٹ اپ نا مد انا بارواٹی اسہ سوج اسے آ اوپارے کہ او اسُل ٹائم فریم تننگ کپک ولے ہرٹائم لائن کانود نا دنگ اٹ مریک۔ ای سی پی آ تینا پت انا درشانی ءِ کرسا وزیراعظم پارے کہ اسہ واکدار ادارہ اس مننگ نا ناطہ الیکشن کمیشن گچین کاری تیکن اسہ خاص ءُ وخت اس مقرر کیک ۔ اسہ سوج اسے نا ورندی ٹی اوپارے کہ پاکستان تحریک انصاف (پی ٹی آئی ) نا زندان اٹی بند سروک ءِ ہموآسراتی تے تننگے ہرافتا او بطور مسکوہی وزیراعظم حق دار ءِ۔ پی ٹی آئی آ پابندی نا سلاہ کابینہ نا مون آ تخنگ نا بابت سوج آ اوپارے کہ حکومت میرٹ نا رداٹ فیصلہ کیک۔ 9 مئی نا واقعہ غا ہیت کرسا اوپارے کہ دادے سدیاسی کارندہ غاک بدامنی تالان کننگ نا کوشست کریر۔ اوپارے کہ پی ٹی آئی نا سروک حقیقت پسندانہ بنداوتیا حکومت آن تیان بے دخلی نا عوامل آتا جاچ ءِ ہلنگ کتو و ہندا سوب آن اودے بھلو وخت اسے ٹی ہچ ءُ سیاسی فائدہ اس ملتنے۔ پاور سیکٹر نا بابت وزیراعظم پارے کہ نگران حکومت نا ٹہفینگ نا 48 گھنٹہ نا تہہ ٹی نن مداخلت کرین و وزیرخزانہ نا کماشی ٹی اسہ اسٹیئرنگ کمیٹی اس ہم جوڑ کرین۔ اوپارے کہ صوبائی حکومت آتے پت اٹی ہلسا انتظامی ردعمل نا بناءِ کننگانے۔ بجلی دُزی و اسمگلنگ نا برخلاف برجاآپریشن نا پائیدار مننگ نا بارواٹی اَرفنگ آ وزیراعظم پارے کہ واک انا جوان کاریم اٹ اتنگ ءِ آخبتی وڑاٹ کاریم اٹ اتنگ نا گرج ءِ۔
