اسلام آباد ۔ 24 مارچ (اے پی پی) بنجائی وزیر جان جوڑی عبدالقادر پٹیل پارینے کہ حکومت ٹی بی نا چٹفنگ کن سنبرینگوک ءِ، مچ آ ملک اٹی وزارت جان جوڑی نا کنڈآن ٹی بی نا مفت درمان ءِ کننگک۔ وزارت جان جوڑی نا کنڈآن جاری بیان نا رداٹ مچ آ دنیا ٹی جمعہ نادے آ ٹی بی نا جہانی دے ءِ اڈتننگ انگ ءِ داوخت آ تینا کلہو اٹی بنجائی وزیر جان جوڑی عبدالقادر پٹیل پارے کہ حکومت ٹی بی نا چٹفنگ کن سنبرینگوک ءِ و دانا چٹفنگ کن مربوط گام گیج آتے پک کننگ ءِ۔ اوپارے کہ مچ آ ملک اٹی وزارت جان جوڑی نا کنڈآن ٹی بی نا مفت درمان ءِ کننگک، حکومت بروک آچین تے ٹی بی آن پاک کننگ کن گچین گام گیج آتے پک کننگ اٹی ءِ۔ اوپارے کہ پاکستان اٹی کم و ود 400،000ٹی بی نا ناجوڑ ہرسال مفت تشخیص و درمان نا آسراتی آن فائدہ ہرفنگ اٹی ءُ۔ ٹی بی نا خطرہ تون مون تننگ کن غٹ صوبہ غاتیٹی 1603 آن زیات جان جوڑی نا آسراتی تیان شپ پوسکن ءُ لیبارٹری ساڑی ءِ۔ ایلو مرض آتیانبار ایڈز، ملیریا و ٹی بی نا تشخیص کن ٹیسٹ بایدے کرفنگے۔ بنائی ریسہ ٹی ٹی بی ءِ وخت آ و آسانی اٹ کنٹرول کننگ مریک۔ مستین اٹ ٹی بی آن لکھ آ انسان زندآن دوتے سلار۔ ولے داسہ بے درمان ءُ مرض اس اف۔ ٹی بی نا مریض نا مخلوق بِنک تو خلیک۔ ببو قول کین ہراوڑ دنیا نا ایلو ملک آک ٹی بی ءِ چٹفیر نن ہم شاری تے آگاہی ایتن۔ اوپارے کہ ٹی بی نا چٹفنگ کن اواری اٹ کوشست آتے برجاتخنہ۔ ٹی بی نا مریض فریشان مف دا 100 درسد درمان نا قابل ءُ ناجوڑی اسے ، نن اواری اٹ ٹی بی ءِ شکست ایتنہ۔
