اسلام آباد۔7جنوری (اے پی پی): مزن وزیر محمد شہباز شریفءَ شمبے ءِ روچءَ کویت ءِ مزن وزیر شیخ احمد نواف الاحمد الجابر الصباحءَ گوں ٹیلیفونءِ سرءَ گپء ُتران کتگ۔ محمد شہباز شریفءَکویتی مزن وزیر ءَ 9 جنوری 2023 ءَ جینوا ءَ بو ہوکیں کلائمیٹ ریزیلیئنٹ پاکستانءِ سرءَ میاں اوستمانی کانفرنسءَ چہ سرپد کتگ ءُ کانفرنسءَ کویت ءِ مزنیں تکءَ ہوار بوہگءِ دزبندی کتگ۔ مزن وزیر کارگس میڈیا ونگءِ نیمگءَچہ شنگ بوتگیں جارءِ ردءَ کویتی مزن وزیر ءَ کلائمیٹ ریزیلیئنٹ پاکستانءِ گامگیجءِ سرجمیءَ ہمراہ داری کنگءِ درشانی کتگ۔ پاکستانءِ مزن وزیر ءَ کویتءِ گوما وتی سیادی ءَ را گیش محکم کنگءِ جزم ءِ درشانی کتگءُ بازیں پڑآں دونیمگی کمک ءَ را گیش کنگءِ وائشتءِ درشانی کتگ۔آئیءَ جانءُ سلامتی، سکیورٹی ء ُ انفراسٹرکچر ءِ پڑآں پاکستانی قوت ءِ بھرتی کنگءِ ھاترءَ کویت ءِ نیمگءَ چہ کتگیں گامگیجاناں ساڑاتگ۔ کویت ءِ مزن وزیرءَ پاکستانءِ گوما دونیمگی سیادی ءَ را گیش محکم کنگءِ وائشت ءِ اوست داتگ۔ دوئیں راہشوناں نزیکیں سیادی ءَ را برجم دارگءُ درائیں پڑآنی سرءَ یکجاہ کنگ ءِ سرءَ تپاک کتگ۔ دوئیں راہشوناں نزیکیں رابطہ ءِ تہا بوہگ ء ُ پاکستان ءُکویت سیادی ءَرا گیش محکم کنگء ُ گیش پراہ ءُ شاہگان کنگءِ عمل ءَ را دیما برگءِ سرءَ تپاک کتگ۔ کویت 1 لکھ ءَچہ گیش پاکستانی آنی مہمان جہلی ءَ کنت ءُ دوئیں ملک آنی دیمروئی ءُ وشھالی ءِ تہا حاسیں کرد پیلو کنگءَ اِنت۔
