جنیوا۔9جنوری (اے پی پی): مزن وزیر محمد شہبا زشریف ءَ گشتگ کہ پاکستان ءَ ہارءَ بازیں تباہی کتگ، ہارءَ چہ انفراسٹرکچر تباہ بوتگ ء ُ ملکی معیشت ہم باز آماچ بوتگ، لکھاں مردمانی لوگ آپ ءَ بُرتگ اَنت، وانگء ُ زانگی ادارگ تباہ بوتگ اَنت، ء ُ کشتءُ کشار تباہ بوتگ اَنت، گرانیں ساہتءَ پاکستان کمک کنوکیں ملک آناں کدی ہم بے ھیال ناکنت، ہارءِ آماچیں مردمانی بحالیءِ ھاترءَ مزنیں کمکے ءِ ضلورت اِنت۔ اے ھیالانی درشانی آئی ءَ دوشمبے ءِ روچءَ ہارءِ آماچیں دمگانی تعمیر نو ء ُ بحالی ءِہوالگءَ ’’ کلائمیٹ ریزیلیئنٹ پاکستان‘‘ ،میاں اوستمانی کانفرنس ءِ بُنگیجی مراگشءَگوں تران کنان ءَ کتگ۔ مزن وزیر ءَگشتگ کہ اے کانفرنس ءِمہمان جہلی ءُ ایشی ءَ گوں تران کنگ منی ھاترء۔ شرپ اِت، منءَ وشی اِنت کہ اقوام متحدہ ءِ سیکرٹری انتونیو گوتریس منی گوما اے کانفرنس ءِ یکجاہی سروکیءَ کنگءَ اِنت۔ انچو کہ ہارءَ چہ پد آئیءَ پاکستان ءِ اُلس ءِ مارشتانی جارچینی کتگءُ جیڑہء ُجنجالاناں پدر کتگ، ایشیءِ سرءَ پاکستان ءِ اُلسءِ نیمگءَچہ آئیءِ شکرءُ منتءَ گراں۔ ہارءَ چہ پد اقوام متحدہ ءِ سیکرٹری جنرل ءَ سندھ ءُ بلوچستان ءَ ہوار ہارءِ آماچیں دمگانی ترء ُتاب کتگء ُ تباہی ءِ چارء ُتپاسی کتگ۔ مزن وزیرءَ گشتگ کہ پاکستان ءَ مزنیں تباہی بوتگ، 33 ملین مردم آماچ بوتگ اَنت وہدے کہ زھگاں ہوار 1700 مردم بیران، لکھاں لوگء ُ ہزاراں کلومیٹر دگ آپءَ بُرتگ اَنت، 10 لکھ جنک زھگاں ہوار 26 لکھ زھگانی وانگءُ زانگ ہلاس بوتگ ۔ گرانیں وہدءَ اقوام متحدہ ، ورلڈ بینک ، ایشیائی دیمروئی بینک ءُ یورپی ملک آں ہوار دنیاءِ بازیں ملک آں مارا کمک کتگ، اے درستانی شکرءُ منتءَ گران ۔ مزن وزیر محمد شہباز شریف ءَگشتگ کہ ہارءَ چہ بوتگیں تباہی ءِ حرچ 30 ارب ڈالر جنگ بوتگ کہ پاکستان ءِ جی ڈی پی ءِ 8 درسد انت، 90 لکھ مردم نیزگاریءِ تہا پھنس اِتگ اَنت۔ آئیءَ گشتگ کہ پاکستان ءِحکومتءَ آماچیں مردمانی کمگء ُ بحالی ءِھاترءَ درائیں آسراتی کارمرز کتگ اَنت، 20 ہزار ٹروپس، سداں چہ گیش ہیلی کاپٹرز ءُ لانچاں ریسکیو آپریشن ءِ تہا بہر زُرتگ ءُ آماچیں مردماناں محفوظیں ہندءُ جاہ آں سرکتگ، 2.7 ملین حانداناں 400 ملین ڈالرءِ کیش گرانٹ داتگ۔ مزن وزیر ءَ گشتگ کہ آ کانفرنس ءِ درائیں باسکانی شکرءُ منتءَ گپت کہ آیاں پاکستانی اُلسءِ دردءَ را مار اِتگ۔ مزن وزیرءَ گشتگ کہ مرچی ما راج دپترءِ ہما کشک ءِ سرءَ اوشتاتگ اَنت کہ پاکستان ءَرا ہارءَ چہ بوتگیں بازیں جیڑہء ُ جنجالانی دیمپانی کنگ بوہگءَ اِنت، پاکستان تنا اے تباہی ءِ دیمپانی ءَ کُت ناکنت۔ آئیءَ اے اُمیتءِدرشانی کتگ کہ اے گرانیں ساہتءَ میاں اوستمانی براتی پاکستان ءِ سرجمی ءَ کمک ءَ کنت۔
