چین اتون صنعتی کمکاری ٹی ننا صنعت ئِ پوسکن جوڑ کننگ اٹی کمک رسینگک، احسن اقبال

اسلام آباد۔ 23اپریل (اے پی پی) بنجائی وزیر ڈٹ بندی ، شونداری و اصلاحات احسن اقبال پارینے کہ چین اتون کمکاری ٹی ننا صنعت ئِ پوسکن جوڑ کننگ اٹی کمک رسینگک۔ حکومت بجلی نا کم پیداوار نا باوجود صنعتی بشخ ئِ اولیتی بنداو تیا بجلی فراوان کرے ، توانائی تنکی نا چٹفنگ آن ملک اٹی پوسکن ئُ صنعت قائم کننگ مریک۔ یک شنبے نا دے جاری کروک آ تینا بیان اٹی او پارے کہ واپاری نسخان نا بھلا سوب ہندی صنعت آتا پیداواری لائخی نا کچ اٹ مننگ ئِ۔ 2013ءاسکان ملکی گرج آتے پورو کننگ کن بھاز انگا غلہ غاتے پیشن نا ملک آن برآمد کننگاکہ، واپاری نسخان نا بھلا سوب برآمد آتیا انحصار کننگ ہم ارے۔ احسن اقبال پارے کہ ساڑی آ صنعتی پیداوار بمشکل ہندی گرج آتے پورو کننگ کیک، 2013ءٹی اقتدار ئِ سنبھالان تو منٹ اسے ہلسا زیات صنعت آک بند ئسر ، بجلی نا فراوانی آن اینو ہندی صنعت بھلو حد اسسکان تینا نت تیا سلیسونے ، زیات تر صنعت آک ہرا پوروی وڑاٹ بند ئسر اینو مسٹ آخا تو اِرا شفٹ آتیٹی ضرور کاریم کننگ ئُ۔ اوپارے کہ پاکستان نا صنعتی بشخ انا رکھ ئِ المی جوڑ کننگ کن ورکنگ گروپ اٹی بنجائی و صوبائی کہول آ صنعت کار آتا تنظیم تا پبی نمائندگی ساڑی ئِ ، صنعتی پیداواراٹی ودکی واپاری نسخان ئِ کم کیک۔