اوغانستان اٹی امن ہمسایہ ملک آک خاص کر پاکستان تون براہ راست گنڈوک ئُ، ہڑتوم آ ہمسایہ ملک آتا سوگو تعلقداری آن امن و ایمنی نا درکار مسخت آتا دوئی ئِ المی جوڑ کننگ مریک
اسلام آباد۔ 23اپریل (اے پی پی) بنجائی وزیر خزانہ سینیٹر اسحاق ڈار پارینے کہ اوغانستان اٹی امن ہمسایہ ملک آک خاص کر پاکستان تون براہ راست گنڈوک ئُ۔ یک شنبے نا دے واشنگٹن اٹی تینا اوغان ہم منصب اکلیل احمد حاکمی تون اوڑدہی ٹی وزیر خزانہ اودے پاکستان نا معاشی حالیت و سرسہبی تا بارواٹی پارے۔ وزارت خزانہ نا جاری بیان نا رداٹ وزیر خزانہ داوخت آ جم اٹنگا قومی پیداوار (جی ڈی پی) نا شرح نمو ٹی ودکی نا بابت حکومت نا کنڈآن کروک آ گام گیج آتیان ہم معلومدار کرے و پارے کہ پاکستان پائیدار اقتصادی شونداری نا کسر آ روان ئِ۔ داوخت آ ہڑتوم آ وزیر خزانہ غاک داہیت آ ہم امنا کریر کہ ہڑتوم آ ملک آک مربوط اقتصادی و واپاری پالیسی تیان گچین معاشی نتیجہ و شونداری نا ہدف آتے دوئی کننگ کیرہ۔ اسحاق ڈار اوغان فوجی کیمپ آ جلہو نا ترندی اٹ مذمت ئِ کرے ہراٹی سد آن زیات بندغ تپاخت کریر۔ اوڈیہہ ٹی امن و ایمنی نا خاطر اوغانستان تون اواری اٹ کاریم کننگ نا پاکستانی عزم ئِ یات ترفے و پارے کہ ہڑتوم آ ہمسایہ ملک آتا سوگو تعلقداری تیان امن و ایمنی نا درکار مسخت آتا دوئی ئِ المی جوڑ کننگ مریک۔ ہڑتوم آ وزیر خزانہ غاک آخبت خڑک اٹی پاک اوغان اسیجائی اقتصادی کمیشن نا دیوان اٹی اوڑدہی آ ہم امنا کریر۔

متعلقہ مضامینمصنف کی طرف سے مزید