اسلام آباد۔ 23اپریل (اے پی پی) قائم مقام اسپیکر قومی اسمبلی مرتضیٰ جاوید عباسی پارینے کہ مسلم لیگ (ن) پاکستان نانظریاتی سیم تا رکھوک جماعت ئِ، ہندا جماعت ملک ئِ تنکی تیان کشا و ہندا جماعت ملک ئِ دنیا نا شون ہلوک ملک آتا صف اٹی سلفک۔ اوپارے کہ گدرینگوک آ مسہ نیم سال اٹی مسلم لیگ (ن) نا حکومت وزیراعظم محمد نواز شریف نا سروکی ٹی پاکستان ئِ شونداری نا کسرآ روان کرینے۔ وزیراعظم محمد نواز شریف ملک ئِ دہشت گردی و تہاری تیان پاک و شونداری نا کسر آ روان کننگ خوائک ولے گڑاس قوت آک خواپسہ کہ ملک آن دہشت گردی چٹے و پاک چین اقتصادی راہداری ہراڈیہہ کن گیم چینجر اہمیت نا تخوک ئُ ڈٹ اس جوڑ مرے۔ اوداخیال آتا درشانی ئِ سرکل لورہ ٹی نواز شریف زندہ باد ریلی نا ساڑی و ہیراں آن سیری روڈ انا بناءنا وخت آ السی مچی آن تران کرسا کرے۔ دا مچی ٹی ممبران ضلع و تحصیل کونسل ایبٹ آباد، مسلم لیگ (ن) یوتھ ونگ لورہ و ایوان واپار لورہ نا عہدیدار آتیان پیدس علاقہ نا سرکڑدہ، مسلم لیگ (ن) نا کارندہ و الس نا اسہ بھلو کچ اس ساڑی ئسر نواز شریف زندہ باد ریلی آن تران کرسا قائم مقام اسپیکر پارے کہ مخالف آک وزیراعظم ئِ ملک انا شونداری نا ایجنڈا غان توننگ کپسہ اوفتا غٹ چمب آک سپریم کورٹ نا فیصلہ تون ہی چٹانو اوپارے کہ وزیراعظم تینا ہر مسٹ آ نسل ئِ احتساب کن پیش کرسا پوسکنئُ جمہوری روایت اس قائم کرینے۔ اوپارے کہ مخالف آتا ہراتم پٹنگ نا واری بریک تو او ملک آن نریرہ۔ اوخواست کرے کہ ہراخلقت نا پن پانامہ پیپرز اٹی بسنے و ہراک خیبر پختونخواٹی کڑز آتے بشخیفینو اوفتا ہم بایدے احتساب مرے۔ اوسپریم کورٹ نا فیصلہ ئِ الس نا فتح گوندسا پارے کہ دافیصلہ غا پاکستان نا الس ہراخوشی نا درشانی ئِ کرینے اونا مثال ملیپک و دا فیصلہ مخالف آتا تابوت اٹی آخریکو میخ ثابت مریک۔ اوپارے کہ پاکستان و اسلام دشمن قوت آتے تینا مذموم مسخت آتیٹی سرسہب مننگ کن ہلنگ پننگک۔ قائم مقام اسپیکر گونڈئُ وخت اسے ٹی یوتھ ونگ لورہ نا کنڈآن نواز شریف زندہ باد نا ریلی نا اڈتننگ نا ستائِ کرے۔
