اسلام آباد۔ 23اپریل (اے پی پی) پاک چین اقتصادی راہداری ڈٹ انا بناءنا اِرا سال پد پاکستان نا ہندی باتی تا زند اٹی خاطر خواہ گچینی و بدلی اس بسنے۔ دا پروجیکٹ چینی حکومت نا ”بیلٹ اینڈ روڈ اینیشی ایٹو“ پروجیکٹ نا اہم ئُ عنصر اسے ہراکہ چینی صدر نا دورہ پاکستان اٹی 2015ءٹی باضابطہ وڑاٹ بناءکننگاسس۔ چائنا ریڈیو انٹرنیشنل نا رپورٹ نا رداٹ ارب آ ڈالر نا ڈٹ اٹی روٹ اتون اوار اوار سنکیانگ اٹی کاشغر ئِ سویل دیکی پاکستان نا بندرگاہ ئِ ملفنگ کن انفراسٹرکچر نا جوڑ جاڑ اوارئِ۔ سی پیک پروجیکٹ نا سیکشن نا جنرل منیجر نثار خان پارینے کہ روٹ اتون اوار اوار جوڑ جاڑی کاریم تیٹی ترندی بننگ آن روزگار نا چندی وارخواہی ودی مسنے انتئے کہ ہندی باتیک دا میگا پروجیکٹ آتا جوڑ جاڑ کن مہارت یافتہ ئُ ہراکہ پول ، سرنگ آتا جوڑ جاڑ و دا ڈٹ آتیٹی کاریم کروک آتا رکھ انا بابت آن ہم چاہندار ئُ۔ نثار خان پارے کہ ہندا ہندی باتی تا مہارت نا سوب بھاز انگا ہند ن ئُ گڑا خننگ کن ملانے ہرا کہ چین انا کنڈآن پاکستان اٹی گدریفنگانو و ہراڑآن پاکستانی قوم فائدہ ہرفنگ ئِ۔ گوادر نا بندرگاہ آ سیکورٹی گارڈ نا وڑاٹ کاریم کروک آ 50 سال انا بشیر احمد پارے کہ بندرگاہ غا بھلو کچ اسے آ مروک آ جوڑجاڑی کاریمک اونا پنچ چناتے کن روزگار نا وارخواہی ودی کرینے۔ اوپارے کہ کنا چینی سنگت آک بھاز خواری اٹ کاریم کیرہ۔ اوفک بھاز جوان ئُ پرائمری اسکول اس جوڑ کننگ اٹی ننا کمک ئِ کریر تانکہ نن تینا زند اٹی گچین اتنگ کین۔ داسہ مچ آ علاقہ ٹی انجینئرنگ نا جوڑ جاڑی کاریمک برجائُ۔ چینی اوورسیز کمپنی بھاز ترندی اٹ کاریم کننگ ئِ و داٹی بھاز پیش رفت ہم مسنے۔ گوادر بندرگاہ ناجوڑ جاڑ اٹی اودے فری واپاری زون اسے ٹی بدلیفنگ کن ودیکی کاریم ہم اوار ئِ ہراکہ 2030 اٹی آپریشنل مننگ والائِ۔ ہائی وے ناپروجیکٹ نا سروکی ئِ چائنا روڈ اینڈ بریج کارپوریشن کننگ ئِ۔ پروجیکٹ آن نئے بیرہ ہندی ٹریفک اٹی گچینی بسنے بلکن روٹ اتون اوار اوار 2500 ملازمت نا وارخواہی ہم ودی مسنے۔ جوڑ جاڑی سائیٹ آ کاریم کروک آ کارندہ غاک خوشی نا درشانی ئِ کرسا پاریر کہ داسہ اوفتے دا مر مر انگا علاقہ غاتا سفر کرسا ہچ وڑنا فریشانی اس مفک وخت اس کہ داکان مست ننے ٹریفک نا ویل آتا مون تروکی ئسک۔
