عمران خان عدالت عظمیٰ نا فیصلہ غان نرنگ نا کسر ئِ اختیار کننگ خوائک ، اونا وزیراعظم جوڑ مننگ نا خواہش وخت اس ہم پورو مفک
اسلام آباد۔ 23اپریل (اے پی پی) مسلم لیگ (ن) نا راہشون و باسک قومی اسمبلی زیب جعفر پارینے کہ عمران خان عدالت عظمیٰ نا فیصلہ غان نرنگ نا کسر ئِ اختیار کننگ خوائک۔ اونا وزیراعظم جوڑ مننگ نا خواہش وخت اس ہم پورو مفک۔ وزیراعظم توانائی نا ڈٹ آتا تینٹ چاروکی ئِ کننگ ئِ ہراڑآن 2018 ءاسکان دا تنکی چٹک۔ داخیال آتا درشانی ئِ او یک شنبے نا دے اے پی پی تون خصوصی ہیت وگپ اٹی کرے۔ اوپارے کہ پانامہ فیصلہ آن مست عمران خان داپارسا دم درینگتوکہ کہ عدالت عظمیٰ نا انت کہ فیصلہ اس بریک اودے امنا کیوہ ولے داسہ تینا حواری تتون اوار عدالت عظمیٰ نا فیصلہ غان نرنگ نا کسر ئِ اختیار کرسا الس ئِ گمراہ کننگ نا بے سہب کوشست کننگ ئِ۔ اوپارے کہ پاکستان نا الس باشعور ئِ و او عمران خان نا پروپیگنڈہ ٹی بفسہ۔ زیب جعفر پارے کہ عمران خان نا وزیراعظم جوڑ مننگ نا تغ وخت اس ہم پورو مفک ۔ اوپارے کہ وزیراعظم نواز شریف پانامہ کیس انا فیصلہ غان مست ہی پاریسس کہ عدالت عظمیٰ نا انت کہ فیصلہ اس بریک اودے جسم و جان اٹ امنا کرسا عملدرآمد کننگک۔ آئین نا آرٹیکل دہ انا رداٹ وزیراعظم ئِ ہموخس ہی حق دوئی ئِ اخس کہ لس شاری تے دوئی ئِ۔ اسہ سوج اسے نا ورندی ٹی اوپارے کہ ملک اٹی توانائی نا تنکی نا بابت پارے کہ توانائی نا تنکی مشرف و اونا حکومت نا ودی کروک ئُ سے و پانزدہ سال اٹی توانائی نا اسہ ڈٹ اس ہم خلنگ تنے۔ زیب جعفر پارے کہ توانائی نا تنکی مسلم لیگ (ن) نا 2013ءنا گچین کاری منشور نا بشخ ئِ ، مچ آ ملک اٹی توانائی نا چندی ڈٹ آتیا ترندی اٹ کاریم برجائِ و وزیراعظم پاکستان میاں محمد نواز شریف تینٹ دا ڈٹ آتا چاروکی ئِ کننگ ئِ۔ اونا پاننگ ئس کہ 2018ءنا لس گچین کاری تیان مست توانائی نا تنکی چٹک۔
