لاہور۔ 03 مئی (اے پی پی) وزیراعظم شہباز شریف پارے کہ ملک ترند انگا زرگزرانی خطرہ غاتیٹی تموک ءِ، ننے مشکل آتا سما ءِ اوفتا مون ءِ توننگ حکومت و اونا سیوتی تا اسیجائی زمواری ءِ۔ وزیراعظم محمد شہباز شریف عئید انا نماز نا خواننگ آن پد جاتی امراء ٹی کارندہ غاتیان تران کرسا پارے کہ اواری اٹ ویل آتے ایسر کننگ نا کوشست کینہ۔ اوپارے کہ تدوک آ پونا چارسال اٹی ننے انتقام نا شست کننگا، شاہد خاقان عباسی، رانا ثناء اللہ، سعد رفیق، مفتاح اسماعیل، مریم نواز، حمزہ شہباز انتقام نا شست مرسا کریر، ای ہمو غٹ سرکڑدہ و کارندہ غاتے سلام پیش کیوہ۔ اوپارے کہ اللہ نا حضور دعا ءِ کہ دا عئید شونداری و شونہالی نا کلہو اس اتے۔ مشکل آتا مون ءِ توننگ کن ننے اللہ نا رضا اتون سخت خواری کروئی مریک۔ شہباز شریف پارے کہ ملکی زرگزران ءِ بھس کننگانے زوت قوم آن تران کیوہ۔ وزیراعظم شہباز شریف پارے کہ اینو گلہ کننگ نا آخا بلکن بغل کننگ نا دے ءِ۔ اوپارے کہ اینو نا دے قوم انا اسہ است مننگ و اواری اٹ بشخندہ نا دے ءِ۔ وزیراعظم شہباز شریف غٹ پاکستانی و عالم اسلام ءِ عئید انا مبارکبادی ہم تس۔ وزیراعظم شہباز شریف و وزیراعلیٰ پنجاب حمزہ شہباز جاتی امراء ٹی عئید انا نماز ءِ خوانار۔ وزیراعظم و وزیراعلیٰ نا کنڈآن عئید انا نماز آن پد ملکی سلامتی و سوگوی کن خصوصی دعا کننگا۔ شہباز شریف و حمزہ شہباز عئید انا نماز آن پد مخلوق تون ملار و عئید انا مبارکبادی تسر۔
