کوئٹہ۔ 03 مئی (اے پی پی) وزیراعلیٰ بلوچستان میر عبدالقدوس بزنجو غٹ اہل وطن ءِ چنکا عئید انا مبارکبادی ترسا پارے کہ چنکا عئید روچہ مبارک آن پد تینا پرہیز گار و نیک بندغ آتیکن اللہ تعالیٰ نا کنڈآن اسہ انعام اسے۔ چنکا عئید انا دے غٹ مسلمان تیکن خوشی تا کلہو اس اتیک بریک، اینو نا دے اللہ تعالیٰ تینا متقی و عبادت گزار بندغ آتیان خوش مرسا اوفتا غٹ دعاتے قبول کیک، اوپارے کہ اینو نا دے نن تینا خوشی تیٹی ہمو بندغ آتے ہم اوار کین ہرا دادے ءِ اڈتننگ نا وس تخپسہ۔ وزیراعلیٰ بلوچستان مستی پارے کہ پاکستان و اسلام دشمن واکدار آک ننا ملک ءِ نزور کننگ خوارہ، ساڑی حالیت آتا خواست ءِ کہ تینا گروہی و لسانی اختلاف آتے گیرام کرسا سیوت و سخا اٹ اسٹ مرین۔ اوپارے کہ انتہاپسندی ، شرانگیزی و دہشت گردی نا ناسور ءِ ماس آن کشن خسن، اوپارے کہ لمہ وطن نا رکھ اکن تینا جون تے ندر کروک آتے خراج عقیدت پیش کین۔ وزیراعلیٰ بلوچستان عبدالقدوس بزنجو مستی پارے کہ تینا عبادت آتیٹی ملکی سوگوی، شونداری، شونہالی و امن کن خصوصی دعاتا اہتمام کین۔ اللہ تعالیٰ ننا ملک ءِ رکھے۔ وزیراعلیٰ دعاکرے کہ اللہ تعالیٰ مسلم امہ ءِ سیوت و یکجہتی ایتے و دشمن تا ناپاک عزم آتے بے سہب کے۔
