فیصل آباد۔ 03 مئی (اے پی پی) بنجائی وزیرداخلہ رانا ثناء اللہ خان پارینے کہ مسکوہی عمرانی حکومت سازش اسے نا سوب آن آخا بلکن تینا کرتوت آتا سوب آن ہنانے انتئے کہ دافک تینا نابودی نا سوب آن نئے بیرہ تینا سیوتی تے اوار ہلسا دننگ کتوس بلکن اوفتا تینا سنگت آک ہم اوفتا غلط پالیسی و الس دشمن گام گیج آتا سوب آن اوفتے ہلار ہنداخاطرآن ملک و قوم ءِ پین نسخان آن بچفنگ کن بدلی نا عمل المی مسوسس و دا عمل پارلیمنٹ نا تہہ ٹی آئینی، کانودی و جمہوری وڑاٹ ایسر مس و اللہ نا شکر ءِ کہ الس نا نابود حکومت آن جان خلاس مسنے و داسہ شہباز شریف نا کماشی ٹی حکومت ملک ءِ دُوارہ ولدا برق رفتاری اٹ شونداری و شونہالی نا کنڈآ دیک۔ او سے شنبے نادے آ چنکا عئید انا نماز ءِ خواننگ آن پد تینا ڈیرہ سمن آباد فیصل آباد آ میڈیا تون گپ وتران کرسا کریکہ۔ اوپارے کہ ملک داوخت مشکل حالیت آتیان گدرینگ انگ ءِ انتئے کہ نابود ٹولی ملکی زرگزران ءِ بھس کرینے ہرانا سوب آن ملک اٹی کبینی نا طوفان بس ولے داسہ حکومت داڑآ کنٹرول کننگ اٹ بھلو حد اسسکان سرسہب مسنے و ہمو گام گیج آتا بناءِ کرینے ہراڑآن الس ءِ زوت ریلیف ملک۔ اوپارے کہ چنکا عئید انا مبارک دے آ نن اللہ آن دعا کینہ کہ ننے ہمت و راہشونی ایتے تانکہ نن قوم انا فریشانی و ویل آتیٹی کمتی اتنگ کین۔ اوپارے کہ نن گچینی نا کنڈآ سفر نا بناءِ کرینن و نن پاکستان ءِ اسلامی، آئینی و جمہوری ریاست اس جوڑ کننگ نا کنڈآ ہِننگ اُن۔ وزیر داخلہ پارے کہ نن السی خذمت آن ہردے ءِ عئید انا دے جوڑ کینہ۔ اوپارے کہ بروک آ 12,14تُو اٹی پوسکن آلس گچین کاریک مننگ والا ءُ ہراٹی قوم کارکڑد نا بنداو آ آخبت نا سرکڑدہ نا فیصلہ ءِ کیک۔ اوپارے کہ نن بروک آ لس گچین کاری تیٹی السی مینڈیٹ دوئی کرسا ملک و قوم انا خذمت نا سفر نا دُوارہ بناءِ کینہ۔ اوپارے کہ ہمو غٹ ڈٹ آتے ہرافتے پی ٹی آئی نا حکومت چٹفیسس دوارہ بناکننگک۔ رانا ثناء اللہ مسکوہی عمرانی حکومت آ تنقید کرسا پارے کہ اسہ حکومت اس ہم اولیکو سال ڈٹ آتا بنا و مسٹ میکو و چارمیکو سال اوفتے پورو کرسا پنچ میکو سال الیکشن اٹ کاہک و تینا کارکڑد نا بنداو آ الس آن وونٹ خواہک ولے عمرانی حکومت اسہ ہم ہندن ءُ ڈٹ اس بناکتو ہرانا اونا چارسالہ مد پورو مننگ آ بناءِ کننگ مریک۔ اوپارے کہ تدوک آ 74 سال اٹی پاکستان تون اوار دنیا نا اسہ ڈیہہ اسے ٹی داوڑ متنے کہ نوک ءِ خننگ نا نن برانز کننگے ولے پی ٹی آئی نا منہ درزن اوباز وڑنا مخلوق عمران نا ہشکاٹی برسا بیہودہ نعرہ خلسا کریر۔ اسہ سوج اسے نا ورندی ٹی اوپارے کہ حکومت عمران خان نا برخلاف ہچ ءُ مقدمہ اس درج کرفتنے بلکن توہین مذہب نا بابت ہرامقدمہ غاک درج مسنو اوفتے ٹی نئے تو حکومت مدعی ءِ نئے گواہ و نئے فریق۔ اوپارے کہ او داہیت انا داعی ءِ کہ اگہ کس اسے نا مذہبی جوزہ غاتے ٹھیس رسینگے تو او تینٹ کانود ءِ دوٹی ہلنگ نا جاگہ غا درست کانودی کسر اس اختیار کرے وخت اس کہ حکومت باور کرفک کہ اودارداٹ ہچ ءُ اڑاند اس شاغپک وکانودی کارروائی تون اوار مقدمہ غاتا غٹ جاست وپاست پورو شفاف، میرٹ آ آجو، منصفانہ و بے کنڈہلوک کننگک تانکہ انصاف نا خواست آک پورو مننگ کیر۔
