کوئٹہ۔ 03 مئی (اے پی پی) صوبائی وزیر تعلیم میر نصیب اللہ مری چنکا عئید انا خوشی تا وخت آ ملت اسلامیہ و پاکستانی قوم ءِ مبارکبادی ترسا پارے کہ ننا حکومت اٹ لس بندغ ہی ننا پالیسی تا وت ءِ و وسیلہ غاتیان محروم بندغ آتے عئید انا خوشی تیٹی اوار کننگ ننا دینی ، اخلاقی و قومی زمواری ءِ، ننے مرے کہ تینا دامون ایمون ہرن و ہموفتے ہم خوشی تیٹی شریک کین ہرا وسیلہ غاتیان محروم ءُ۔ اینو نن غٹ تینا خوشی تیٹی غریب و کم وسیلہ تپہ غاتے اوار کین۔ اوپارے کہ اینو ننے وطن نا رکھ اکن تینا نہادی جون تے ندر کروک آتا عظیم قربانی تے ہم یات تخوئی ءِ۔ وطن نا خاطر جام شہادت نوش کروک آ نرزور گلزادہ غاتا عظیم لمہ و باوہ و خاہوت آتے ہم خوشی تیٹی شریک تخنگ ننا اسیجائی زمواری ءِ۔ اوپارے کہ چنکا عئید مسلمان تیکن شکر و اللہ نا حضور سجدہ شکر بجااتنگ نادے ءِ۔ اوپارے کہ چنکا عئید انا حقی معنی لس بندغ ءِ تینا خوشی تیٹی شریک کننگ ءِ و لس بندغ نا احساس ءِ کننگ آن عئید انا چس اِرا ہنداخہ پین مریک۔ اوپارے کہ دہشت گردی نا برخلاف جنگ اٹی شہید مروک آتا بے مٹ قربانی تے مدام یات تخنگک، چنکا عئید انا وخت آ نن شہید آتا عظیم خاہوت تون تفوک اُن۔
