اسلام آباد۔ 03 مئی (اے پی پی) وزیراعظم شہباز شریف متحدہ عرب امارات (یواے ای) نا سلہہ بند فوج انا ڈپٹی سپریم کمانڈر و یواے ای نا ولی عہد شہزادہ محمد بن زید النہیان ءِ ٹیل فون کرسا اودے و یو اے ای نا برادر الس ءِ چنکا عئید انا مبارکبادی تس۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم یواے ای نا سرکڑدہ غاتا جوان جان جوڑی و برادر اماراتی الس نا امن و شونہالی کن نیک است خواہی نا درشانی ءِ کرے۔ یواے ای نا ولی عہد وزیراعظم پاکستان ءِ عئید انا مبارکبادی ترسا خیرخواہی نا جوزہ غاتا درشانی ءِ کرے۔ اوہڑتوم آ برادر ملک آتا نیام اٹ کمکاری آ مبنی مریس مدتی تعلقداری تے پین سوگو کننگ نا عزم انا درشانی ءِ کرے۔ وزیراعظم شہباز شریف یواے ای نا تینا ساڑی آ دورہ ٹی ولی عہد تون تینا سرجم سلابت نا حوالہ ءِ ترسا تینا و تینا ڈل انا جم و جوش اٹ مہمانداری آ ولی عہد نا منت واری ءِ ہرفے۔ وزیراعظم زور شاغا کہ تین پہ تینی فائدہ ٹی ہڑتوم آ کنڈآتا کمکاری خاص وڑاٹ واپار ، زرکاری و زرگزرانی کمکاری ءِ پین ترند کننگ کن او یواے ای نا سرکڑدہ غاتون اواری اٹ کاریم کننگ نا خواہندار ءِ۔ وزیراعظم تینا یواے ای نا ساڑی آ دورہ نا دمدستی پد متحدہ عرب امارات نا زرگزرانی ڈل ءِ گدریفنگ آ ولی عہد نا منت واری ءِ ہرفے ہرا ہڑتوم آ ایلم الس نا نیام اٹ ہڑتوم آ کنڈآتا تعلقداری اسہ پوسکن ءُ بشخ اسے نا ودکی ءِ۔ وزیراعظم ولی عہد ءِ تینا اولی فرصت اتی پاکستان نا دورہ ءِ کننگ نا سلہ خلک۔ ہڑتوم آ راہشونک ہڑتوم آ کنڈآتا شریداری عمل و جہانی کہول آ کمکاری نا پین مون آ دننگ کن خڑکی رابطہ استوار تخنگ آ امنا کریر۔
