المی آ گڑاتا نہاد آتے کنٹرول کننگ نا کوشست کننگ اُن، الس زوت جوان ءُ خبراس بِنک، مفتاح اسماعیل

کراچی۔ 03 مئی (اے پی پی) بنجائی وزیر خزانہ مفتاح اسماعیل پارینے کہ حکومت المی آ گڑاتا نہاد آتے کنٹرول کننگ کن تینا کہول آ ہرممکن کوشست کننگ ءِ و الس زوت جوان ءُ خبراس بِنک۔ اوسے شنبے نادے آ عئید انا نماز آن پد میڈیا تون گپ وتران کرسا پارے کہ یوٹیلیٹی اسٹور آتیٹی دوئی نُت و بورہ نا نہاد آک مہالو آن کم کننگانو وخت اس  کہ عام مارکیٹ اٹی ایلو المی آ گڑاتا نہاد آتے کنٹرول کننگ کن گام گیج کننگ انگ ءِ۔ مسجد نبوی صلی اللہ علیہ و آلہ وسلم اٹی پیش بروک آ واقعہ غا گپ وتران کرسا مفتاح اسماعیل ترندی نا درشانی ءِ کرسا پارے کہ پی ٹی آئی نا کرینگ و بدتمیزی نا سیاست حالیت آتے داتسکان سرکرینے۔ وزیرخزانہ مفتاح اسماعیل مستی پارے کہ داہم ننا زمواری ءِ کہ نن تینا چنا و تینا کارندہ غاتے ہیل ایتن و سیاسی وڑاٹ تربیت ایتن کہ او امر برتاؤکیر۔ مسکوہی حکومت نا کرپشن کیس آتا بابت اَریفوک آ سوج انا ورندی ٹی مفتاح اسماعیل پارے کہ جاست وپاست برجاسلک و کرپٹ مخلوق ءِ انصاف نا کٹہرے ٹی اتنگ کن غٹ کیس آتے پورو وڑاٹ ہُننگک۔