کوئٹہ۔ 03 مئی (اے پی پی) انسپکٹر جنرل پولیس بلوچستان محسن حسن بٹ چنکا عئید انا وخت آ بلوچستان نا غٹ پولیس آفیسر و کارندہ غاتے روچہ مبارک اٹی گچین خذمت ادا کننگ و چنکا عئید انا مبارکبادی پیش کرینے۔ اوپارے کہ بلوچستان پولیس فورس چنکا عئید انا وخت آ مسیت، امام بارگاہ و ایلو ہندآتیا مروک آ عئید انا اجتماع تا سیکورٹی کن تعینات آفیسر وکارندہ غاک پبی خواری، لگن و فرض شناسی انا جوزہ اٹ ہائی الرٹ مرسا فرض ءِ ادا کریر وخت اس کہ ڈی آئی جی کوئٹہ تون اوار غٹ سینئر آفیسر آک تینٹ فیلڈ آ پیش تمسا سیکورٹی بست وبند آتا چیکنگ ءِ ہم پک کریر تانکہ الس بے خوف و خلیس مذہبی فرض انا ادائیگی آن پد عئید انا خوشی تے اڈتننگ کیر، نوک ءِ خننگ نا نن آ کوئٹہ تون اوار غٹ بھلا شار تیٹی اہم مارکیٹ و شاہراہ تیا شاری تا سیکورٹی کن ودکی دستہ تعینات کننگا وخت اس کہ ہوائی سم کاری، ون ویلنگ نا کمک اٹ شاہراہ تیا ٹریفک نظام ءِ زہمی کروک آ زموار آتا برخلاف سخت کارروائی کننگا۔ اومستی پارے کہ بازار، شاپنگ سنٹر و مارکیٹ آتا سیکورٹی کن پٹرولنگ فورس آتون اوار اوار سادہ لویس اٹ کارندہ ہم تعینات کننگا وخت اس کہ بازار ، شاپنگ سینٹر و مارکیٹ آتیٹی سٹریٹ کرائم نا واقعہ غاتا توننگ کن پیٹرولنگ فورس ایگل فورس انا گشت ءِ پین گچین کننگا۔ آئی جی پولیس بلوچستان محسن حسن بٹ نا مستی پاننگ ئس کہ اینو ننے وطن نا رکھ اکن تینا نہادی جون تے ندر کروک آتا عظیم قربانی تے ہم یات تخوئی ءِ۔ وطن نا خاطر جام شہادت نوش کروک آ نرزور گلزادہ غاتا عظیم لمہ و باوہ و خاہوت آتے ہم خوشی تیٹی شریک تخنگ ننا اسیجائی زمواری ءِ۔ اوپارے کہ دہشت گردی نا برخلاف جنگ اٹ شہید مروک آتا بے مٹ قربانی تے مدام یات تخنگک۔ چنکا عئید انا وخت آ نن شہید آتا عظیم خاہوت آتون تفوک اُن۔
