اسلام آباد۔ 03 مئی (اے پی پی) مچ آ ملک اٹی چنکا عئید ءِ روایتی مذہبی جم وجوش اٹ اڈتننگا، بنجائی دارالحکومت اسلام آبا د اٹی عئید انا نماز نا غٹ آن بھلا اجتماع فیصل مسجد اٹی مس، صدر مملکت ڈاکٹر عارف علوی چنکا عئید انا نماز ءِ اسلام آباد وخت اس کہ وزیراعظم محمد شہباز شریف رائے ونڈ اٹی خوانا۔ سے شنبے نادے آ صوبائی دارالحکومت آتیٹی ہم عئید گاہ و جامع مسیت آتیٹی عئید انا نماز نا بھلا اجتماع مس۔ لاہور اٹی عئید انا نماز نا غٹ آن بھلا اجتماع تاریخی بادشاہی مسیت اٹی مس۔ کراچی و کوئٹہ تون اوار ملک انا غٹ شار و خلق آتیٹی چنکا عئید انا اجتماع تیٹی ملک انا سالمیت ، شونداری و بقاء کن دعا کننگا وخت اس کہ خطیب حضرات و آئمہ کرام آک عئید انا نماز نا خطبہ غاتیٹی مسجد نبوی صلی اللہ علیہ و آلہ وسلم اٹی پیش بروک آ است ہسون واقعہ نا مذمت ءِ کریر۔ آزاد کشمیر و گلگت بلتستان تون اوار اوار مقبوضہ کشمیر اٹی ہم چنکا عئید ءِ روایتی مذہبی جم وجوش اٹ اڈتننگا۔ ملک انا گیشتر علاقہ غاتیٹی مرکزی رویت ہلال کمیٹی نا پڑو نا رداٹ سے شنبے نادے آ چنکاعئید ءِ کننگا۔ خیبرپختونخوانا گیشتر ضلع غاتیٹی ہم چنکا عئید ءِ اڈتننگا۔ صدر مملکت ڈاکٹر عارف علوی چنکا عئید انا نماز ءِ اسلام آباد نا فیصل مسجد اٹی خوانا۔ گڑاس بنجائی وزیر، اسلام آباد اٹی متعین اسلامی ملک آتا سفیر، بڑزکو سرکاری آفیسر و شار انا سرکڑدہ غاک ہم صدر مملکت تون اوار عئید انا نماز ءِ خوانار۔ صدر مملکت عئید انا نماز نا خواننگ آن پد مخلوق ءِ عئید انا مبارکبادی تسر۔ وزیراعظم عئید انا نماز آن پد ملک انا یکجہتی ، شونداری و شونہالی کن دعا کرے۔
