اسلام آباد۔ 02 مئی (اے پی پی) وزیراعظم شہباز شریف پاکستان تون اوار مچ آ امت مسلمہ ءِ چنکا عئید انا مبارکبادی ترسا اوفتے کن نیک است خواہی و خیرخواہی نا جوزہ غاتا درشانی ءِ کرینے۔ عئید آ تینا کلہو اٹی وزیراعظم پارے کہ روچہ مبارک نا بابرکت و رحمت آتیان پبی ساعت آتیان پد اللہ تعالیٰ عئید انا انعام ءِ عطاکرینے ہرا رب کریم نا بے پناہ عنایت آتا درشانی ءِ۔ اوپارے کہ صبر، ایثار و قربانی نا دا مقدس تُو ننے ایلو فتا تکلیف نا ہرا احساس ءِ عطا کرینے، اونا خواست ءِ کہ چنکا عئید انا خوشی تے اڈترسا نن تینا دامون ایمون غٹ نادار و مفلس و ضرورت مند بندغ و خاہوت آتا خاص خیال ءِ تخن، ہندا دادے انا حقی روح و نبی رحمت خاتم النبیین صلی اللہ علیہ و آلہ وسلم نا کلہو ءِ۔ وزیراعظم پارے کہ حکومت قوم ءِ لوڈشیڈنگ نا عذاب آن پورو نجات ترفنگ کن سنبرینگوک ءِ و پبی کوشست کننگ ءِ، چنکا عئید انا مسہ دے لوڈشیڈنگ کپننگ نا پرمان کرینے تانکہ اہل وطن عئید انا خوشی تے پبی وڑاٹ اڈتننگ کیر۔ وزیراعظم شہباز شریف پارے کہ چنکا عئید انا خوشی و مست آن کبینی نا خلوک الس نا تکلیف آتے مون آ تخسا پیٹرولیم مصنوعات آتا نہاد آتیٹی ودکی کننگتو، کنا تینا قوم اتون قول ءِ کہ ننا ہردے، ہرپل و ہر لائخی نما زند اٹی آسانی اتنگ کن خڑچ مریک، ہر بروک آ دے اتون نم محسوس کیرے کہ نما حکومت نا خواری نا نتیجہ ٹی نما مشکل آتیٹی کمتی بننگ ءِ۔ وزیراعظم پارے کہ اینو نا خوشی تا دادے ءِ نن تینا فلسطین و مقبوضہ جموں و کشمیر نا محکوم مسلمان ایلم و ایڑھ تے ہم یات کینہ و دعا کینہ کہ اللہ تعالیٰ اوفتے ظلم و جور و استبداد آن نجات ترفے و آجوئی نا نعمت آن سرفراز کے۔ اوپارے کہ نن تینا اوغان الس کن ہم نیک است خواہی تا درشانی ءِ کرسا اوغانستان اٹی پائیدار امن، شونداری و شونہالی کن دعا کینہ۔
