لاہور۔ 29 اپریل (اے پی پی) مسلم لیگ ن نا راہشون حمزہ شہباز وزیراعلیٰ پنجاب نا سوغند ہلپننگ نا برخلاف مسٹ میکو وار لاہور ہائیکورٹ اتون رجوع کرے۔ حمزہ شہباز مسٹ میکو وار دائر درخواست اٹ موقف اختیار کرے کہ لاہور ہائی کورٹ سوغند ہلنگ نا بارواٹ فیصلہ تس ولے عدالتی پرمان تیا عملدرآمد کپننگ انگ ءِ۔ درخواست اٹی پیدوار کننگاکہ گورنر پنجاب اسہ وار ولدا عدالتی پرمان ءِ مننگ آن انکار کننگ ءِ و درخواست تروک حمزہ شہباز آن سوغند ہلپننگ انگ ءِ۔ درخواست اٹی پاننگاکہ صدر مملکت و گورنر ءِ سوغند کن فیصلہ ٹی سلاہ تننگا ولے اوکان پد ہم سوغند ہلنگتو۔ درخواست اٹی پیدوار کننگاکہ صوبہ نا شاری و حمزہ شہباز نا بنداوی حق اکن ہائیکورٹ نیام تمے و صوبہ ءِ آئینی وڑاٹ چلیفنگ کن سوغند ہلنگ نا پرمان کننگے۔ درخواست اٹی خواست کننگاکہ حمزہ شہباز آن سوغند ہلنگ کن نمائندہ اس مقرر کپننگ و سوغند ہلپننگ نا گام ءِ آئین آن چپ گوندنگے۔ درخواست اٹی داہم خواست کننگانے کہ حمزہ شہباز آن سوغند ہلنگ کن وخت و جاگہ نا ہم تعین ءِ کننگے۔
