اسلام آباد۔ 28 اپریل (اے پی پی) بنجائی وزیر جان جوڑی عبدالقادر پٹیل نا کماشی ٹی وزارت نا سینئر آفیسر آتا دیوان اس مس۔ وزیر جان جوڑی ءِ وزارتی امور و وزارت نا کارکڑد نا بارواٹ ہم حوال تننگا۔ اوپارے کہ غٹ آفیسر آتے خواری و جوزہ اٹ کاریم کروئی مریک ۔ اوپارے کہ جان جوڑی نا بشخ اٹی گچینی اتنگ کن مربوط و گچین حکمت عملی نا رداٹ گام گیج کروئی مریک۔ ساڑی حکومت الس نا راجی آسراتی آ یخین تخک۔ اوپارے کہ سوالی تا درخواست آتے سرتننگ کن وخت آ و فاسٹ ٹریک آ کاریم کروئی مریک۔ اوپارے کہ جان جوڑی نا بشخ انا شونداری و اودے مون آ دننگ کن ترند رفتاری اٹ کاریم کننگک۔ ننے مستین نا کلچر ءِ بدل کروئی ءِ و ہدف آتا دوئی کننگ کن سخت خواری کروئی مریک۔ اوپارے کہ جان جوڑی نا بشخ بھاز حساس ءِ ہراٹی ہروڑنا سلنگ و لاپرواہی ءِ سگنگ پننگک۔ بنجائی وزارت جان جوڑی تون ہسپتال و بھاز انگا اہم ادارہ غاک ءُ ہرافتے گچین وڑاٹ چلیفنگ آفیسر آتا زمواری ءِ۔ وزارت جان جوڑی نا آفیسر آتے تینا کاریم نا وڑوڈول و رفتار ءِ پوسکن آ خواست آتون ہم گرنچ کروئی مریک ۔ اوپارے کہ سوالی تا ویل آتے سرتننگ کن فائل آتے وخت آ سرتروئی مریک۔ الس ءِ ریلیف فراوان کننگ نا بابت ڈیوالئی و لاپرواہی ءِ سگنگ پننگک۔ اوپارے کہ حکومتی ہدف آتے دوئی کننگ کن کاریم نا رفتار ءِ ودفوئی مریک۔ اوپارے کہ الس نا حالیت زار اٹی گچینی جان جوڑی نا آسراتی تے مخلوق اسکان سرکننگ و ناجوڑی تا توننگ ننا مسخت بایدے مرے۔ وزیر جان جوڑی عبدالقادر پٹیل تینا کنڈآن پورو پبی سپورٹ فراوان کننگ نا عزم انا درشانی ءِ کرے۔ اوپارے کہ نن اواری اٹ جان جوڑی نا بشخ انا گچینی کن گچین گام گیج آتے پک کینہ۔ دیوان اٹی بنجائی سیکرٹری ہیلتھ عامر اشرف خواجہ و ڈی جی ہیلتھ ہم ساڑی ئسر۔
