اسلام آباد۔ 28 اپریل (اے پی پی) بنجائی وزیر چاگڑدی بدلی سینیٹر شیری رحمان پارینے کہ وزارت چاگڑدی بدلی غٹ صوبہ غاتے ہیٹ ویو نا باضابطہ الرٹ جاری کرینے، باسنی نا دا ترند انگا ریسہ نا سوب آن مخلوق نا جان جوڑی و کشت وکشار ءِ ہم خطرہ مون تروک مریک، مخلوق آن خواست ءِ کہ ترند انگا باسنی آن بچنگ کن رکھی گام گیج اختیار کیر۔ پنچ شنبے نادے آ تینا اسہ بیان اسے ٹی بنجائی وزیر پارے کہ دنیا تون اوار سویلی ایشیا ءِ داسال بھاز باسنی نا ریسہ نا مون تروک ءِ۔ پاکستان و بھارت نا سیمی علاقہ غاتیٹی درجہ حرارت 49 آن 50 ڈگری سینٹی گریڈ اسکان ہِننگ نا گڑتی ظاہر کننگانے۔ شیری رحمان پارے کہ وخت آن مست باسنی نا ترند انگا ریسہ ٹی ودکی چاگڑدی بدلی و گلوبل وارمنگ نا نشانی ءِ، پاکستان ءِ مارچ آن بے گمانی باسنی نا ترند آ ریسہ نا مون تروک ءِ۔ اوپارے کہ دا سال پاکستان اٹی درجہ حرارت اٹ ہروار آن 6 آن 8 ڈگری سینٹی گریڈ ودکی نا گمان ءِ۔ محکمہ موسمیات نا رداٹ داسال مارچ 1961آن داتم اسکان نا باسن انگا تُوئس، مارچ اٹی پِرآک ہروارآن 62 درسد کم ریکارڈ کننگانو۔ شیری رحمان پارے کہ سال 2018 ٹی ہم اپریل نا تُو اٹی نواب شہ دنیا نا باسن انگا شار مس ہراتم پارا50 ڈگری سینٹی گریڈ آن بڑزآ ہنا، جہانی ادارہ غاک سال انا بناٹی پاکستان اٹی وخت آن مست، ترند و مریس باسنی نا ریسہ نا بابت خبڑدار کریسس۔
