اسلام آباد۔ 28 اپریل (اے پی پی) وزارت خزانہ نا ترجمان اسٹیٹ بینک آن پوسکن آ وام تا دوئی کننگ نا بارواٹ سوشل میڈیا غا پیری کنوک آخبر ءِ بے بنداو و راستکی تیان چپ گوندسا پارینے کہ حکومت اسٹیٹ بینک آن ہچ ءُ پوسکن ءُ وام اس دوئی کتنے۔ پنچ شنبے نادے آ داڑے جاری بیان نا رداٹ وزارت خزانہ نا ترجمان پارے کہ سوشل میڈیا غا اسہ خبر اس گردش کننگ ءِ ہراڑآن دا تاثر تننگ انگ ءِ کہ حکومت اسٹیٹ بینک آف پاکستان آن وام ہلکونے ہرا پورو وڑاٹ غلط و زری ٹک آتا بارواٹ کم فہمی نا عکاسی ءِ کننگ ءِ۔ ترجمان پارے کہ ہراوڑ مانیٹری ٹیبل اٹ رپورٹ کننگک، حکومت بجٹ نا مسخت آتیکن اسٹیٹ بینک آن وام، وام نا اسٹاک و اسٹیٹ بینک اتون حکومتی ڈیپازٹ آتا نیام اٹ پرخ انا حساب وکتاب نا بنداو آ ہلنگک۔ ہنداخاطرآن اسٹیٹ بینک اتون کیش بیلنس اٹ شیف و بڑزی و ایلو اکاؤنٹنگ کنونشن تا سوب آن جم وام تا حسا ب وکتاب اٹ ردوبدل مننگ کیک۔ ترجمان پارے کہ دا بدلی بجٹ نا مسخت آتیکن پوسکن آ وام انا سوب آن آخا بلکن اسٹیٹ بینک اتون حکومتی کیش بیلنس اٹ بدلی نا سوب آن بریک۔ ترجمان پارے کہ حکومت اسٹیٹ بینک ترمیمی ایکٹ و آئی ایم پروگرام نا شڑت آتیا عملدرآمد اٹی سنبرینگوک ءِ۔ حکومت اسٹیٹ بینک آن ہچ ءُ پوسکن ءُ وام اس دوئی کتنے بلکن اوکان چپ حکومت مسکوہی وام تا مد پورو مننگ آ اسل زر انا ادائیگی کننگ ءِ۔
