کوئٹہ۔ 27 اپریل (اے پی پی) کنسلٹنٹ کوآرڈنیٹر بلوچستان تھنک ٹینک نیٹ ورک (BTTN)بریگیڈیئر آغا احمد گل (ر) پارینے کہ طالب علم و استاد آتا نیام اٹ گپ وتران اٹی تعلیم نا بست وبند ءِ کننگے و خوف انا جاگہ غا اومیت نا چاگڑد اتون تہذیب و کامریڈ شپ تعلیم نا نتیجہ و پہچان مرے۔ استاد آک سیاست اٹ اوار مننگ و طالب علم آتون درو کننگ و جعلی ڈگری تا دوئی کننگ آن پاناد کیر۔ اگہ حقی تعلیم ءِ مون آ دروئی ءِ تو دا کلچر نا چٹفنگ المی ءِ۔ اگہ دا دودوربیدگ ءِ راجی وڑاٹ مسترد کننگتو تو بلوچستان نا ہچ ءُ آخبت اس اف۔ داخیال آتا درشانی ءِ او ر بلوچستان تھنک ٹینک نیٹ ورک (BTTN)بلوچستان اٹی تعلیم نا کمک اٹ ورناتا شونداری نا سرحال آ اسہ ویبینار اسے آن تران کرسا کرے۔ داوخت آ پینل اٹی ترانکار آتا وڑآ تینا بشخ آتا قابل ذکر چاہندار آک اوار ئسر، ہرافتے ٹی ڈاکٹر فیض کاکڑ، ڈاکٹر اثرایس خان، مسٹر امجد رشید و ڈاکٹر ایم سعادت بلوچ، دیوان نا کما شی ءِ بریگیڈیئر آغا احمد گل (ر) کرے۔ بریگیڈیئر (ر) آغا احمد گل (ر) ترانکار آتا اوفتا وخت و ساف و گوئی آن پبی گپ وتران کننگ آ منت واری ءِ ہرفے۔ اویات ترفے ساڑی ہی ٹی بلوچستان نا صوبائی اسمبلی آن منظور کروک آ ہائیر ایجوکیشن ایکٹ آ اسہ سوج اسے نا ورندی ٹی اوپارے کہ دا یکٹ ہمو شق آتا گواچی ءِ ہرا تینائی گری ، جانبداری ، میرٹ نا بے عزتی و ائس چانسلر آتا ملازمت آتے رکھ فراوان کپک۔ اووائس چانسلر آتا گچینی نا وڑوڈول ءِ ہم نامناسب گوندا۔ اوپرزور سفارش کرے کہ تعلیم ءِ غیر سیاسی کننگے و مچ آ ماڑی ءِ میرٹ آ تخنگے و وائس چانسلر آتیکن ملازمت آتا رکھ ءِ پک کننگے، درحقیقت پرنسپل و ہیڈماسٹر آتیکن ہم پک کننگے انتئے کہ او غٹ آن مست و غٹ آن اہم منتظم ءُ ۔ او داہیت آ زور شاغا کہ بلوچستان نا کسبکار ورناک بلوچستان نا راجی و اقتصادی شونداری و راجی آسراتی ٹی ودکی کیرہ۔ ایسر اٹ یونیورسٹی آف بلوچستان نا ڈاکٹر میر سعادت بلوچ پاور پوائنٹ ڈسپلے ءِ کاریم اٹ اتسا طالب علم و استاد آتا نیام اٹ رابطہ نا کمتی و اومیت نا جاگہ غا خوف آ چکار کننگ نا وضاحت کرے۔ اوشارہ کرے کہ ورناتیٹی بے روزگاری نا کچ 60 درسد آ تالان ءِ و اسکول ءِ اِلوک آ ورناتا کچ بھاز زیات ءِ۔ اوتعلیم نا کمک اٹ بلوچستان نا ورناتا شونداری کن چندی وڑوڈول و پین فنڈ جتا کننگ نا سلاہ تس۔
