اسلام آباد۔ 27 اپریل (اے پی پی) وزیراعظم شہباز شریف پارت کرینے کہ بے نظیر انکم سپورٹ پروگرام آن بیدس سوب اسے آن کشوک آ حقدار بندغ آتا اوار کننگ ءِ پک کننگے، داڑکن وڑوڈول اس مون آ اتنگ ستاکڑزک۔ داخیال آتا درشانی ءِ او چارشنبے نادے آ بنجائی وزیر تخفیف نیزگاری شازیہ مری تون اوڑدہی ٹی کرے۔ اوڑدہی ٹی وزیراعظم ءِ وزارت نا بابت سرجمی اٹ حوال ترسا وزیراعظم نا دورہ بلوچستان اٹی حقدار بندغ آتا بے نظیر انکم سپورٹ پروگرام اٹی شمولیت و طالب علم آتا تعلیم ءِ پک کننگ کن وظیفہ و لمہ و باوہ غاتے امداد نا پڑو آ خراج تحسین پیش کننگا۔ وزیراعظم ءِ بے نظیر انکم سپورٹ پروگرام آن تدوک آ حکومت نا کنڈآن بیدس جاست وپاست آن کشوک آ ہشت لکھ بیست ہزار مخلوق کن اپیل نا مجوزہ وڑوڈول آ ہم حوال تننگا۔ وزیراعظم پارے کہ بے نظیر انکم سپورٹ پروگرام اٹی کشوک آ بندغ آتا دُوارہ شمولیت کن اپیل نا وڑوڈول اس مون آ اتنگ ستاکڑزک۔ اوپارت کرے کہ ہمو حقدار بندغ آک ہرافتے بے سوب آن کشنگا اوفتا شمولیت ءِ پک کننگے۔
