بلاول بھٹو زرداری بنجائی وزیر نا حیثیت اٹ سوغند ہرفے، صدر مملکت ڈاکٹر عارف علوی اوڑآن سوغند ہلک

اسلام آباد۔ 27 اپریل (اے پی پی) پاکستان پیپلزپارٹی نا چیئرمین بلاول بھٹو زرداری بنجائی وزیر نا حیثیت اٹ سوغند ہرفے۔ سوغندی دود چارشنبے نادے آ داڑے ایوان صدر اٹی اڈ ہلک، صدر مملکت ڈاکٹر عار ف علوی اوڑآن اسہ سادہ ولے پروقار دود اسے ٹی سوغند ہلک۔ سوغندی دود اٹی وزیراعظم محمد شہباز شریف، اسپیکر قومی اسمبلی راجہ پرویز اشرف، مسکوہی صدر آصف علی زرداری ، بنجائی کابینہ نا باسک آک، پارلیمنٹ نا باسک آک ، سول و فوجی کمامدارآک، پاکستان پیپلزپارٹی نا راہشون تتون اوار حکومت اٹی اوار سیوتی جماعت آتا سرکڑدہ، وزیراعلیٰ سندھ و ایلو اہم شخصیت آک بشخ ہلکر۔ کابینہ ٹی بلاول بھٹو زرداری ءِ بنجائی وزیر نا حیثیت اٹ اوار کننگانے۔ داکان مست کابینہ نا ٹہیفنگ نا اولیکو ریسہ ٹی 19 اپریل آ 30 بنجائی وزیر و مسہ وزیر مملکت سوغند ہرفیسر، ارٹ میکو ریسہ ٹی 22 اپریل آ بنجائی کابینہ ٹی ودکی کننگاسس و کابینہ ٹی مسہ بنجائی وزیر و اسہ وزیر مملکت اسے اوار کننگاسس۔ کابینہ ٹی مہالو آن مسہ سلاہکار تے ہم اوار کننگانے۔