اسلام آباد۔ 27 اپریل (اے پی پی) وزیر داخلہ رانا ثناء اللہ جامعہ کراچی دھماکہ نا ڈوہدار تے دزگیر کننگ و عبرت نا نشان جوڑ کننگ نا عزم انا درشانی ءِ کرینے۔ چارشنبے نادے آ تینا بیان اٹی اوپارے کہ او وزیراعظم شہباز شریف نا پارت آ کراچی آ ہِننگ ءِ۔ اوپارے کہ مچ آ پاکستان تینا چینی ایلم تتون پبی یکجہتی کیک، دا ننا کل انا غم ءِ۔ وزیر داخلہ پارے کہ کراچی ٹی چینی شاری تے شست کننگ پاک چین سنگتی آ جلہو اسے، پورو واک اتون دا دہشت گردی تون مون ایتنہ۔ وزیر داخلہ پارے کہ او تعلقدار کمامدارآتون اوڑدہی کرسا راستکی تے معلوم کیک و جاست وپاست اٹ عظیم دوست چین ءِ پورو وڑاٹ معلومدار تخک۔ اوپارے کہ چینی باتی تا سیکورٹی نا غٹ آپریٹ آتا اول سرآن جاچ ءِ ہلنگک اوکان پد پین گچین گام گیج کینہ و خوڑتی اٹ ہر پلو نا جاچ ءِ ہلنگک۔ اوپارے کہ ڈوہدار تے دزگیر کننگ کن بنجائی حکومت پبی کمک کیک۔
