اسلام آباد۔ 27 اپریل (اے پی پی) بنجائی وزیر حوالکاری و شینکاری مریم اورنگزیب وزیراعظم شہباز شریف نا اِرا ہفتہ نا کارکڑد نا جاچ ءِ پیش کرے، نت، بورہ ، سی انا خلوک الس ءِ اڑزآن گڑتا فراوانی بناکرینے، وزیراعظم شہباز شریف بورہ نانہاد ءِ 85 روپئی آن کم کرسا 70 روپئی، 10 کلو نت انا تھیلہ نا نہاد ءِ 550 روپئی آن کم کرسا 400 روپئی کریسس۔ چارشنبے نادے آ تینا اسہ بیان اسے ٹی اوپارے کہ چار سال اٹی کبینی تاریخ نا بڑزکو آ کچ آ سرکننگاسس ہراٹی پدریسہ کمتی بننگ بناکرینے۔ اوپارے کہ وزیراعظم شہباز شریف اِرا ہفتہ ٹی ہمو کاریم تے کرے ہرافتا عمران خان چار سال اٹی سوچ ہم کننگ کتو۔ اوپارے کہ وزیراعظم اِراہفتہ ٹی بجلی نا بند 27 آن 20 پیدواری یونٹ آتے فعال کرے، بجلی نا کارخانہ غاتے چلیفنگ کن تیل و گیس انا فراوانی کن ریکارڈ گام گیج کننگا۔ اسہ سال آن تکنیکی خرابی تا سوب آن بند تموک کارخانہ غاک ولدا آن بحال مننگ لگانو۔ اوپارے کہ چار سال آن بند اسلام آباد میٹرو بس نا ڈٹ چاردے اٹی بناکرے۔ اوپارے کہ نیو اسلام آباد ہوائی اڈہ آن میٹرو ءِ موٹروے و فیض آباد تون گنڈنگ ، بھارہ کہو و روات اسکان ودکی تننگ نا فزیبلٹی نا تیاری بناکرینے۔ اوپارے کہ موٹروے آ میٹرو نا اسٹیشن اس جوڑ کننگ نا گام  ءِ ہرفے۔ اومستی پارے کہ دیامر بھاشا ڈیم آ کاریم نا رفتار ءِ ودفے، ڈیم ءِ 2029 ء نا جاگہ غا 2026ء ٹی پورو کننگ نا پوسکن ءُ ڈیڈ لائن اس تخا، ہندی آبادی کن گچین و پوسکن آ درمان کن ہسپتال نا فزیبلٹی تیار کننگ نا پرمان کرے۔ اوپارے کہ وزیراعظم شہباز شریف خضدار کچلاک شاہراہ ءِ ارٹ آن چار رویہ و ولدا بروک آ ریسہ ٹی شش رویہ کننگ کن سیکشن 1 و 2 نا بنداو ءِ تخا۔ داکان بیدس وزیراعظم بلوچستان نا ورناتے کسبکار کننگ کن پاکستان نا غٹ آن پوسکن آ ٹیکنیکل یونیورسٹی نا ڈٹ انا پڑو ءِ کرے۔ وزیراعظم شہباز شریف راولپنڈی، اسلام آباد، لاہور ، ملتان ، کراچی آنبار کوئٹہ ٹی ہم میٹرو سروس نا بزیبیلیٹی تیار کننگ نا پرمان کرے۔ وزیراعظم شہباز شریف بلوچستان نا نیزگار آ پنچ لکھ مخلوق ءِ بے نظیر انکم سپورٹ پروگرام آن امداد تننگ نا پڑو کرے۔