اسلام آباد۔ 27 اپریل (اے پی پی) وزیراعظم محمد شہباز شریف سعودی عرب نا ولی عہد شہزادہ محمد بن سلمان بن عبدالعزیز نا سلہ غا (اینو) 28 اپریل آن 30 اپریل 2022 اسکان سعودی عرب نا دورہ ءِ کیک ، دورہ ٹی وزیراعظم نا سعودی سرکڑدہ غاتون ہڑتوم آ کنڈآتا اوڑدہی ٹی اقتصادی ، واپاری و زرکاری تعلقداری تے پین مون آ دننگ، سعودی عرب اٹی، پاکستانی افرادی قوت کن پوسکن ءُ وارخواہی ودی کننگ آ گپ وتران مریک۔ وزیراعظم آفس میڈیا ونگ آن جاری سرجم حوال آتا رداٹ ہندا تُو انا ویل اٹی عہدہ ءِ سنبھالنگ آن پد وزیراعظم نا دا اولیکو پیشن نا ملک انا دورہ مریک۔ دورہ ٹی کابینہ نا اہم باسک آتون اوار بڑزکو کہول انا ڈل ہم وزیراعظم تون مریک۔ دادورہ ٹی وزیراعظم سعودی سرکڑدہ غاتون ہڑتوم آ کنڈآتا اوڑدہی کیک و خاص وڑاٹ ہڑتوم آ کنڈآتا اقتصادی، واپاری و زرکاری تعلقداری تے پین مون آ دننگ و سعودی عرب اٹی ، پاکستانی افرادی قوت کن پوسکن ءُ وارخواہی ودی کننگ نا بابت گپ وتران کیک۔ ہڑتوم آ فریق آتا نیام اٹ تین پہ تینی است خواہی نا چندی علاقائی و جہانی امور آہم گپ وتران مریک۔ پاکستان و سعودی عرب نا نیام اٹ برادرانہ تعلقداری ءِ ہرا تین پہ تینی پت ، افہام و تفہیم ، خڑکی کمک و اسہ ایلو تون تفنگ نا آخبت روایت آ مبنی ءِ۔ پاکستان نا الس ، خادم حرمین شریفین ءِ بھاز عزت نا نظراٹ ہرک۔ ہڑتوم آ ملک آتا نیام اٹ علاقائی و جہانی فورم تیا خڑکی تین پہ تینی کمکاری ، ہڑتوم آ کنڈآتا تعلقداری نا سوگوی نا درشانی ءِ۔ سعودی عرب جموں و کشمیر آ او آئی سی رابطہ پڑک نا باسک ءِ۔ مملکت سعودی عرب اٹی رہینگوک آ 20 لکھ آن زیات پاکستانی ہڑتوم آ برادر ملک آتا شونداری، شونہالی و زرگزرانی شونداری ٹی تینا کڑد ءِ ادا کننگ ءُ۔