اسلام آباد۔ 27 اپریل (اے پی پی) بنجائی وزیر خزانہ و محصولات مفتاح اسماعیل پارینے کہ پاکستان و برطانیہ نا نیام اٹ دیرینہ تاریخی تعلقداری ءِ و تعلقداری تیٹی ودکی آن ہڑتوم آ ملک آتے اسہ وڑ فائدہ رسینگک۔ اوداہیت ءِ چار شنبے نادے آ داڑے پاکستان اٹی برطانیہ نا ہائی کمشنر کرسٹیان ٹرنر تون اوڑدہی ٹی گپ وتران کرسا پارے۔ داوخت آ برطانیہ نا شونداری ٹیم انا سروک اینابل گیری ہم ساڑی ئسک۔ بنجائی وزیر برطانوی ہائی کمشنر ءِ جم و جوش اٹ بخیر کرے و ہڑتوم آ کنڈآتا است خواہی نا امور آ اوڑتون گپ وتران کرے۔ اوبرطانوی ہائی کمشنر ءِ گیشتر اقتصادی ایجنڈا و ساڑی حکومت نا اولیت آتیان ہم معلومدار کرے۔ بنجائی وزیرپارے کہ حکومت اقتصادی و مالیاتی سوگوی اتنگ خواہک ہراڑآن زرگزران نا بحالی ٹی کمک رسینگک و پائیدار اقتصادی شونداری ہم ممکن مریک۔ برطانوی ہائی کمشنر تینا حکومت نا کنڈآن وزیر خزانہ ءِ مبارکبادی پیش کرے و اوڑکن نیک است خواہی نا درشانی ءِ کرے۔ اوپارے کہ پاکستان و برطانیہ نا نیام اٹ بے مٹ تعلقداری ءِ ہرادے پین سوگو کننگک۔ اوبرطانیہ نا حکومت و الس نا کنڈآن پاکستان ءِ پورو مخ تفی نا باور کرفے۔ وزیرخزانہ کمک فراوان کننگ آ برطانیہ نا ہائی کمشنر نا منت واری ءِ ہرفے۔
