کوئٹہ۔ 27 اپریل (اے پی پی) پاکستان پیپلزپارٹی کوئٹہ ڈویژن نا صدر خیر محمد ترین پارینے کہ پاکستان پیپلزپارٹی ہی ملک انا الس کن اومیت نا آخیریکو روشنائی ءِ ملک اٹ جمہوریت نا سوگوی کن پارٹی نا خذمت آک ناقابل فراموش ءُ پیپلزپارٹی ملک انا فائدہ غاتا خاطر پی ڈی ایم و اپوزیشن ءِ یکجا کرسا سلیکٹڈ حکومت ءِ چٹفے، پی ٹی آئی سرکڑدہ دا چاہسنے کہ فارن فنڈنگ کیس اٹ او بھاز بے وڑ اختہ مسنے ہنداخاطرآن ملکی ادارہ غاتیا بہتان خلنگ پی ٹی آئی نا وطیرہ جوڑ مسنے۔ داڑے جاری مروک اسہ بیان اسے ٹی خیر محمد ترین پارینے کہ پاکستان پیپلزپارٹی مدام الس ءِ اوفتا حق انا فراوانی کن ہر فورم آ توار بڑز کرینے ہندا سوب ءِ کہ اینو پاکستان پیپلزپارٹی الس نا است آتیٹی ءِ و پارٹی ءِ چٹفوک آک تینٹ چٹار ولے پاکستان پیپلزپارٹی اینو ہم زندہ ءِ۔ اوپارے کہ پاکستان پیپلزپارٹی نا چیئرمین بلاول بھٹو زرداری شہید ذوالفقار علی بھٹو و شہید جمہوریت گودی بے نظیر بھٹو نا نظریہ و منشور ءِ ہلسا مون آ ہِننگ ءِ۔ اوپارے کہ پاکستان پیپلزپارٹی ہی ہمو اسٹ انگا سیاسی و جمہوری جماعت ءِ ہرا الس نا بنداوی ویل آتے ایسر کننگ کیک۔ اوپارے کہ پاکستان پیپلزپارٹی نا چیئرمین بلاول بھٹو زرداری و مسکوہی صدر آصف علی زرداری ملک انا فائدہ غاتا خاطر پی ڈی ایم و اپوزیشن جماعت آتے یکجا کرسا سلیکٹڈ حکومت ءِ جمہوری وڑاٹ چٹفیر۔ اوپارے کہ پی ٹی آئی نا اقتدار ءِ گوہنگ آن پد آئینی ادارہ غاتے شست کننگ است ہسونی اسے الیکشن کمیشن نا مون آ 10 بندغ اتسا زور شاغنگ مفک داکان مست ایلو آئینی ادارہ غاتے ہم شست کننگا دا روش غیر جمہوری و غیر سیاسی ءِ۔ اوپارے کہ پی ٹی آئی فوج و عدلیہ نا برخلاف سوشل میڈیا غا غلیظ ٹرینڈ چلیفے ہرا مذمت نا قابل ءِ پاکستان اسہ جمہوری ءُ ملک اسے ہراڑے آئین اٹ ہر ادارہ نا دنگ درج ءِ۔ اینو الیکشن کمیشن نا مون آ برانز کروک آک است آن دریر کہ چیف الیکشن کمشنر ءِ اوفک گچین کریسر۔ اوپارے کہ پی ٹی آئی فارن فنڈنگ کیس اٹ تینا برخلاف گمانی فیصلہ غا ہبکہ ئی نا گواچی ءِ۔
