وزیراعظم شہباز شریف نا الس کن چنکا عئید آ بھلو ٹیکی اس، یکم مئی آن لوڈشیڈنگ ءِ پورو چٹفنگ، بزغرآتے کشاری مشینری چلیفنگ کن ڈیزل نا بے سلنگ آن فراوانی ءِ پک کننگ نا پارت

اسلام آباد۔ 26 اپریل (اے پی پی) وزیراعظم شہباز شریف الس  ءِ چنکا عئید اکن بھلو ٹیکی اس ترسا 30 اپریل اسکان غٹ ویل آتے تورسا یکم مئی آن ملک اٹی لوڈشیڈنگ ءِ پورو چٹفنگ نا پارت کرے وخت اس کہ ڈیزل نا مصنوعی کاختی ودی کروک آتا پیدواری  و اوفتا برخلاف سخت کارروائی نا پارت ہم کرینے۔ سے شنبے نادے آ وزیراعظم آفس میڈیا ونگ آن جاری بیان نا رداٹ وزیراعظم شہباز شریف نا کماشی ٹی ملک اٹی بجلی نا اعلانیہ و غیر اعلانیہ لوڈشیڈنگ آ بڑزکو کہول انا ہلہلہ ئی دیوان اس اڈ ہلک۔ دیوان ءِ حوال اٹی پاننگاکہ شہباز شریف سپیڈ آ عمل کرسا اسہ سا ل آن زیات بند تموک 27 بجلی گھر تیان 20 ءِ فعال کننگا۔ 20 بجلی گھر تا دُوارہ چلینگ انگ آن بجلی نا پیدوار اٹی ودکی مسنے، تدوک آ حکومت چار سال اٹی بجلی گھر تیکن ایندھن ہلتنے ، ساڑی حکومت بیرہ اِراہفتہ ٹی نئے بیرہ ایندھن نا بست وبند کرے بلکن دا بجلی گھر تیان بجلی نا پیدوار ءِ ودفسا لوڈشیڈنگ  ءِ ہم توننگ انگ ءِ۔ وزیراعظم ءِ پاننگاکہ ملک اٹی بجلی نا جم پیدوار کم و ود 18500 میگاواٹ ءِ، طلب نا رداٹ بجلی نا شارٹ فال 500 آن 2000 میگاواٹ ءِ۔ وزیراعظم شہباز شریف ءِ حکومت سنبھالنگ تون حوال تننگاسس کہ 25 بجلی گھر ایندھن مفننگ نا سوب آن یا پین تکنیکی خرابی تا سوب آن بند تموک ءُ لوڈشیڈنگ نا بھلو سوب تدوک آ حکومت نا بجلی گھر چلیفنگ کن ایندھن نا وخت آ فراوانی نا ڈٹ مفننگ ءِ۔ دیوان ءِ پاننگا کہ لوڈ شیڈنگ نا ایلو سوب آتیٹی ایندھن فراوانی ٹی ویل، بجلی گھر تا وخت آ جوڑ جاڑ و خیالداری ٹی مجرمانہ لاپرواہی ءِ ، وزیراعظم منصب ءِ سنبھالنگ تون دمدستی دا بجلی گھر تے فعال کننگ نا پارت جاری کریسس، داکان بیدس وزیراعظم ءِ بشخوک آ کمپنی تا نسخان اٹی ہنوک آ فیڈر آتا بابت ہم سرجمی اٹ معلومدار کننگا۔ وزیراعظم 30 اپریل اسکان غٹ ویل آتے تورسا یکم مئی آن بجلی نا لوڈشیڈنگ ءِ چٹفنگ نا پارت جاری کرے۔ الس ءِ باسنی تیٹی بجلی نا لوڈشیڈنگ آن مشکل آتیٹی اختہ کننگ کپنہ۔ وزیراعظم پارت کرے کہ ایندھن نا مربوط و آخبتی نظام نا ٹہیفنگ  و باسنی تیٹی بروک آ تُو انا پیشگی ڈٹ بندی کیر۔ وزیراعظم نسخان اٹی ہنوک آ بجلی نا بشخوک آ کمپنی تا فیڈر آتا نسخان ءِ چٹفنگ نا مریس مدتی گچین ڈٹ بندی اس طلب کرے۔ فصل آتا روتنگ اٹی ڈیزل نا مصنوعی کاختی ودی کننگ نا غاو آ وزیراعظم سخت نوٹس ہلسا پرمان کرے کہ مصنوعی کاختی ودی کروک آتا پیدواری ءِ کیر، دمدستی و سخت کارروائی کیر۔ وزیراعظم شہباز شریف پارت کرے کہ بزغرآتے کشاری مشینری چلیفنگ کن ڈیزل نا بے سلنگ آن فراوانی ءِ پک کننگے، خلقی علاقہ غاتیٹی ضلعی انتظامیہ پک کے کہ بزغرآتے ڈیزل نا دوئی کننگ اٹ ہچ وڑنا مشکل مون تروک مف۔ دیوان اٹی بنجائی وزیر حوالکاری مریم اورنگزیب ، مسکوہی وزیراعظم شاہد خاقان عباسی و تعلقدار بڑزکو کمامدارآک ساڑی ئسر۔